Despues cu e organisacion di AMF a anuncia siman pasa cu e pista di Palo Marga lo ta habri pa testing diasabra ultimo, un grupo di coredo a dicidi di acudi personalmente na Palo Marga pa asina nan cuminsa prepara nan garage y wak den kico mas nan por duna un man pa prepara pa e temporada di 2017.
Locual nan a topa cune sigur nan no por a spera! Aparte di e situacion di e facilidadnan rond di e pista, a bin tuma nota di un situacion bastante preocupante, vooral awo cu henter e pueblo di Aruba ta preocupa pa e situacion di insiguridad y ola di atraconan cu tin riba nos isla. Tur cos ta indica cu e toren di Palo Marga a wordo converti den un luga pa asina un of mas persona por biba of at least drumi den dje, mientras cu e parti bou di e trapi pa subi bay den e toren, a wordo completamente cera cu pallet y asina tambe wordo converti den un tipo di camber.
Tambe e parti dilanti di e toren unda antes tabata tin klinkers a wordo completamente yena cu pallet. Esaki a disgusta e coredonan masha tanto mes como cu e area aki dilanti di toren ta un luga unda ora di eventonan grandi ta sponsor y personanan VIP so ta wordo permiti den e area aki y e parti abao di e toren ta unda cu prensa mester por tin facilidad pa asina nan por traha y manda nan informacionan relaciona cu e caredanan. No por ta asina cu ta yena e luga jen di pallet y converti e parti abao den un camber unda tin colchon stiwa riba otro y te hasta boter di alcohol a wordo haya, mientras cu tur e bentana nan tabata cera cu cortina pa asina esnan pafo no por wak kico ta pasando of ken ta na e parti paden di e toren drumi.
Ta wordo pensa hasta cu e palletnan dilanti a wordo strategicamente poni unda tabata ta tin klinkers pa asina haci sonido ora un hende yega como cu ta duda cu nan a wordo poni pa upgrading di e facilidad. Mientras tanto e coredonan a keda di tuma contacto cu e organisacion cu ta representa coredonan di drag pa asina formalmente expresa nan disgusto y ta spera cu autoridad local tambe tuma bon cuenta di e situacion aki paso nan lo no kier ni pensa cu e facilidad unda nan ta practica nan deporte preferi por ta un luga unda ilegalnan ta hospeda of bay sconde pa autoridad, pasobra si ta asina esaki si, nan lo no permiti pa sigui pasa.