BERLIN, Alemania- Un pakete sospechoso a wordo haya den un mercado di Pasco, den e ciudad di Postdam, cerca di Berlin. Esaki a keda anuncia diabierna na autoridadnan, casi un aña despues di e atake yihadista mas letal perpetra na Alemania.
Aunke cu polis a informa na prome instante di cu tabata trata di un artefacto explosivo, poco despues e minister di Interior di e estado regional di Brandenburg, Karl-Heinz Schröter, a afirma cu no ta sigur cu ta un explosivo.
Polis a sigura despues cu nan no a haya niun detonador. Den un tweet, el a precisa cu e pakete sospechoso tabata un “obheto cilindrico cu kabel, bateria y clabo”. Polis a sigui bisa cu un homber a entrega un pakete unda cu tabata tin un caha di metal na e botica dilanti di e mercado di Pasco.
Un empleado di e luga a alerta polis, cu a duna ordo pa evacua un parti di e centro di e ciudad aki di Alemania, situa den parti zuid-oost di e capital Aleman.
E temporada di mercadonan Navideño, masha aprecia pa e Alemannan, a cuminsa e siman aki den e pais. Den e centro di Berlin, caminda e atakenan a tuma luga aña pasa, a wordo reforsa cu medidanan di siguridad mas severo.
Fuente: https://www.afp.com