E playoff final di futbol Division di Honor a start sali den stadion Guillermo Prospero Trinidad na Dakota, yen di ambiente y cu un fanaticada di futbol entusiasma. Mescos cu playoff final di temporada pasa, e aña aki e mesun cuater ekiponan lo bolbe lucha pa e titulo maximo di Aruba su futbol. E ekiponan di RCA, Britannia, Dakota y Deportivo Nacional tabata esnan cu mas a sobresali durante di e campeonato regular y merecidamente nan ta den e playoff di Aruba su futbol. Nos no mester lubida cu e hungadornan di Division di Honor ta nos maximo representantenan di futbol na Aruba y den exterior.
Den e ultimo añanan e federacion di futbol AVB a trece diferente cambio den e futbol local. Varios di nan cambionan aki tabata exigencianan stipula pa e federacion mundial di futbol FIFA hunto cu CONCACAF cu ta maneha e futbol den nos region. Tur esaki ta na bienestar di e desaroyo positivo cu kier logra cu e deporte na nivel regional, continental y mundial. Futbol ta keda e deporte di mas grandi, mas gusta y praktica na mundo.
Lotto, e Loteria di Aruba kier felicita y alabes desea AVB, e clubnan participando na e playoff final di futbol Division di Honor y e fanaticada di futbol hopi exito.
Cumprando weganan di Lotto, e Loteria di Aruba bo ta contribui na deporte riba nos isla. Meta di e fundacion ta pa organisa loteria, cambia bida di su hungadonan y na mes momento inverti den deporte local pa medio di donacionnan na e Comision di Subsidio.