Pa trece un cambio, mester actua diferente. Pa actua diferente, mester pensa diferente. Pa pensa diferente mester di informacion prome cu nos por forma un opinion y vision. Eynan e rabo ta krul. Con accesibel informacion ta na Aruba? Segun candidato riba lista di MEP, Mireille St. Jago, akinan e hecho cu nos ta uza cuater idioma ta hunga un rol grandi. Antes Bijbel tabata na Latijn y e cristiannan no tabata por (ni permiti) pa les’e. Awe nos ta wak cu idioma por pre-selecta ken ta ricibi cierto informacion. Na nos scolnan esaki tambe ta sosode. Muchanan cu domina e idioma di instruccion bon, tin mas chens pa ta exitoso den nos sistema di enseñansa.
Aki mi ta corda riba e autor Mericano: Hyrum W. Smith cu a bisa: “You can’t think any deeper than your vocabulary will allow you to.” Awor mi pregunta ta: E idioma di instruccion na scol ta yuda nos como un pueblo pa por pensa mas profundo y critico? Nos yiunan y nos mes tin un vocabulario den cualkier idioma pa por defende nos mes? Pa nos por pensa mas profundo y pa vocifera nos propio opinion y ta autocritico, bo mester di por lo menos un vocabulario amplio di mas o menos 20.000 palabra na Hulandes, di cual 40% di e studiantenan na Hulanda mes no ta logra e nivel ey.
Ta pesey mi kier pone enfasis un biaha mas, pa nos no solamente bisa cu nos kier un cambio, pero pa nos realisa cu cada cambio ta cuminsa cu un cambio den bo manera di pensa, bo manera di actua y bo manera di reacciona. Esey ta primordial pa nos logra un cambio pa pais Aruba. Pensa diferente, actua diferente y vota. Pa mi un votador consciente ta necesario pa nos logra e cambio pa miho asina desea.