Pa nos no lubida- 1 juli 1863 ta e dia mas importante di nos historia

0
RBC Juli 2018
ling and sons porciento
Funmiles-2018

Dia 1 juli 2018 lo siguiente a wordu trese dilanti den Misa Katoliko na Rinkon pa James Finies di Nos Ke Boneiru Bek:

Dia 1 juli 1863 ta e dia historiko di mas importante di nos historia. Ta e dia di e nasementu di e pueblo Boneriano I e dignidat Boneriano. Nos ta selebra e dia aki pa respet pa nos ansestornan, ku a wordu ranka for di nan kas ansestral, ranka for di nan rais, ranka for di nan kultura, nan religion, nan famia I hogar, ranka for di nan mes mundu. A sufri, a wordu oprimi, abusa I humiya pa awe nos por ta aki awe huntu , komo hende, komo hende liber, atrobe.

E dia aki, 1 juli, ku no a hanja atenshon ku e merese den nos edukashon na skol ni tampoko den nos historia. Pero ta e dia ku e Boneriano a nase, e dia ku e Boneriano a wordu rekonose komo hende, e dia ku nos no tabata mas un obheto o poseshon di un donjo mas, komo katibu. Ta e dia ku nos a hanja derecho pa ta hende I ta liber, pa kuminsa nos proseso di emansipashon I kuminsa krea nos nashon Bonaire. Ta e dia ku e dignidat Boneriano a nase, I kuminsa gatia, I pasa miseria I lucha, pa a logra krea e Boneriano ku nos konose awe I ku nos ta orguyoso di e identidat Boneriano, ku ta basa riba norma I balornan masha haltu, e dignidat di e Boneriano. Dignidat ta loke ta hasi nos hende, hende liber no ta un outo, un iphone o kosnan material , ta dignidat humano, loke nos ansestornan a logra riba 1 juli 1863.

Hopi di nos ta wordu bisa o laga kere ku nos no a bini di katibu, pero kasi nos tur tin raskonan di DNA origina bek na nos antepasadonan katibu.

Por puntra ta dikon mi ta aki den misa katoliko ta papia tokante abolishon di sklabitud I emansipashon.
Ta iglesia katoliko ta esun ku tabata krusial pa abolishon di sklabitud. Nos tur a tende di Tula na Korsow. Pero poko di nos sa di Martis di Katalina Janga, di Rinkon, Bonaire, katibu ku a lanta kontra di e opresornan na plantage Fontein pa lucha pa nos libertat.

Esey ta un parti di nos historia ku nos no a wordu eduka, I ta meskos a falta pa eduka nos ku kasi un siglo despues, kasi 100 anja despues, komo ultimonan, despues ku tur kasi tur otro isla Karibenjo a aboli sklabitud, ta Iglesia Katoliko, monsigneur Niewindt, tabata e figura prinsipal, ku a lucha, skirbiendo kartanan di protesta na gobiernu Hulandes pa duna nos nos libertad. I Despues di basta anja Hulanda su gobierno a start ku abolishon di sklabitud I ku a logra na 1 juli 1863.

Pa es motibu, pa nos no lubida hamas, ami di Nos Ke Boneiru Bek a start un proseso pa urgi gobiernu di Bonaire pa rekonose Martis di Katalina Janga komo herue nashonal di Bonaire, meskos ku a hasi ku Tula na Korsow. I traha un estatua na honor di Martis di Katalina Janga, na un lugar sentral, na e rotonde dilanti Misa Katoliko na Playa, meskos ku ta trahando algu ku heru bieuw na e rotonde di Hato awor aki.

Esaki ta pa tur Boneriano I tur bishitante wordu rekorda di nos lucha pa nos libertat I nos dignidat, I tur ora, kada momento, nos I nos futuro generashonan wordu rekorda di e fecha di 1 juli, e dia di nasementu di e pueblo Boneriano, nasementu di e dignidat Boneriano, I ku nos tur lo defende nos dignidat Boneriano ku fe, speranza I ku alma I kurpa te den eternidat.

James Finies, Nos Ke Boneiru Bek – 1 juli 2018

Comments

comments

C: Heineken
new india
dvg