E aña aki un bes mas un delegacion hoben den e deporte di bowling lo asisti na e asina yama Torneo Caribeño Paradise Kids Jose Luis “Chegui” Carde cu ta wordo organisa na e ciudad di San Juan, Puerto Rico. E torneo aki ta uno cu pa di 22 aña ta wordo organisa y Aruba ya tin cinco aña ta participando activamente den e torneo aki. E torneo lo tin un duracion di 4 dia esta 26, 27, 28 y 29 di December mientras lo wordo hunga den e categorianan individual, dobbel y ekipo. E biaha aki Aruba lo asisti cu un delegacion hoben masculino consisti di e hungadornan Renald Thiel, Yannick Roos, Kaelan Roos y Jared Felipa. Remarcabel ta cu den e 5 añanan cu Aruba ta participando semper e ta bin cu trofeo cas den un torneo di nivel halto caminda prospectonan grandi den e deporte di bowling ta participa, sigur esnan di e propio pais Puerto Rico.
Algun siman atras Aruba a competi cu un delegacion masculino den un torneo Pre-Panamericano na Lima, Peru unda e mihonan di e continente Americano a topa otro. Aki nos bolicheronan a logra un resultado satisfactorio. Den e delegacion ey e hobennan Thiel y Roos tambe a participa mientras awo nan lo competi den e torneo na Puerto Rico.
Un danki sigur na Lotto, e Loteria di Aruba pa medio di Comision di Subsidio cu lo subsidia e biahe di e delegacion di bowling pa e torneo Caribeño Paradise Kidd Jose Luis Carde na San Juan, Puerto Rico
Cumprando weganan di Lotto, e Loteria di Aruba bo ta contribui na deporte riba nos isla. Meta di e fundacion ta pa organisa loteria, cambia bida di su hungadonan y na mes momento inverti den deporte local pa medio di donacionnan na e Comision di Subsidio.