Otmar Oduber di plataforma politico POR ta felicita pueblo di Aruba cu inauguracion di Plaza Padu, un plaza cu ta rindi homenahe na nos tata di cultura, Padu Lampe y tambe na Rufo Wever y Lio Booi, compositornan di nos himno Aruba Dushi Tera.
Oduber, kende te november ultimo tabatin e honor di carga e responsabilidad como Minister di Cultura tabata full involucra den e proyecto aki durante henter su ehecusion y ta sinti su mes hopi emociona di por mira un joya di proyecto keda cla pa tanto local como bishitante disfruta di dje y cu ta engrandece nos cultura y graba nos historia mas ainda.
E ta bisa cu Plaza Padu ta encera no solamente e plaza, pero tambe un estatua di e tres compositornan di nos himno, un obra di arte traha door di nos artista local Ciro Abath y cu pueblo di Auba lo bay conoce oficialmente diabierna awo.
Otmar Oduber kier a gradici dos persona en especial cu tabata hopi involucra cu e obra di arte aki y cu a haci su realisacion posibel, Alice van Romondt y Indra Zaandam. Tambe el a felicita Gobierno di Aruba pa e vision cu a keda concretisa y tambe pa e financiamento di Plaza Padu den su totalidad cu a wordo realisa pa nos Oficina di Turismo, ATA. No por keda sin menciona TPEF (Fondo di Turismo pa Producto Aruba) cu a financia e estatua di nos compositornan, es decir, Plaza Padu ta un proyecto cu a wordo logra danki na e cooperacion, trabou conhunto di hopi persona, departamento y instancianan, cu ta demostra cu trahando hunto por logra cosnan grandi.
Miembro di POR a mustra cu Plaza Padu ta e culminacion di e atencion duna na cultura di nos isla y den e caso aki specifico na monumentonan den centro di ciudad. Maneho di monumentonan bou di maneho di Otmar Oduber tabata dirigi riba restauracion y mantencion di nos monumentonan. Durante ultimo añanan varios di e monumentonan rond di nos isla a haya e atencion mereci engrandeciendo nos cultura tangibel, esunnan cu ta rondona Plaza Padu ta edificio di Algemene Rekenkamer cu ta ex biblioteca, Stadhuis/Censo, Fort Zoutman y Cosecha. Pero esaki ta solamente algun cu a haya e atencion, pasobra di punta pa punta nos monumentonan a haya atencion, manera ta Faro, Museo Arkeologico, Oficina di Monumento, Watertoren na Playa y San Nicolas y Nicolaas Store.
Oduber a finalisa bisando cu nos momentonan mester sigui haya e atencion debido pa por mantene nos cultura tangibel bibo entre nos comunidad y transmiti esaki tambe na nos bishitantenan. “Pabien Aruba cu nos Plaza Padu y un Feliz Dia di Himno y Bandera!”