Hopi lo puntra si ya tin un nomber y color y ken ta bay riba lista. Otmar Oduber, ex minister di turismo, transporte, sector primario y cultura, a splica kico ta e proceso cu e ta tumando.
E ta comenta cu logicamente cu e anuncio ta mas dedica na su famia y na comunidad di Aruba pa e decision cu e ta tuma. Hopi speculacion cu esaki ta parti di algo planifica. Si e tabata planifica e ora e decision lo a wordo tuma masha tempo caba.
E empeño tabata hopi cla di purba di uza e vehiculo, crea mas stabilidad cu ta posibel den decisionnan cu ta wordo tuma. E partido, na e momentonan aki ta wordo forma. Statutonan ta practicamente cla. Statutonan lo wordo comparti naturalmente hunto cu tur esnan cu ta lanta e organisacion. E no ta un organisaicon di Otmar Oduber. E ta un organisacion pa Aruba, caminda cu lo tin participacion tambe di tur angulo aki na Aruba y caminda cu tur hende ta wordo yama bon bini. Tin cu bisa si berdad cu tin hopi persona cu ta forma parti di e organisacion nobo aki, cu ta combersando y ta poniendo tur e piedranan hunto, tur e blokinan hunto, pa por construi e plataforma nobo aki, e forsa nobo aki na Aruba. Den e prome mita di December a compromete caba como grupo cu e organisacion aki lo wordo formalisa na Notario y lo wordo presenta tambe na comunidad di Aruba pa loke ta trata color, pa loke ta trata nomber, pa loke ta trata e prome grupo cu en berdad ta bay sostene e organisacion aki y tin cu agrega cu Oduber ta haya hopi message cu si e nombernan ta klop of no. E tarea principal y a bis’e biaha pasa, tin un sosten abrumador cu tin na e momentonan aki pa un politica diferente, pa un forsa nobo, no tin duda cu esey ta existi y cu ta anhela na Aruba. Pero e di dos fase ta mesun importante y den e di dos fase ey, na momento cu a acerca diferente persona den nos comunidad y diferente gruponan tambe cu a yega cerca, a pone cu por tuma e decision y bisa cu enberdad ta un momento pa continua den politica, pero tambe hinca un organisacion hunto cu e grupo aki den otro cu lo wordo presenta den e prome mita di December.
A puntra Oduber kico ta ta pensamento di e hendenan cu El a papia riba caya pa loke ta e tema di geel/Berde berde/geel awor cu e ta tambe ta lanta su mes un partido.
Tur cu kier traha cu e ponencianan cu ta wordo treci dilanti door di e plataforma aki, lo sinta cu cua partido cu ta cu kier forma parti di e solucionnan cu ta presenta na un forma pragmatico cu ta e base riba cual e organisacion politico aki lo wordo crea. E base riba cual ta bay atende cu e problema, cada un den su forma y segun e miho forma cu ta posibel y di un otro banda naturalmente un partido politico no por papia di forma ningun coalicion, te ora cu tin un resultado di eleccion.
Un resultado di eleccion lo duna kende ta esnan cu un gobierno a duna un sosten, a mantene su confiansa of a retira esaki y na e momento ey por cuminsa papia di un posibel coalicion y den ki direccion e ta bay.
Tin hopi hende ta pensa cu e decision mester a wordo tuma basta tempo caba. Hopi ta bisa cu ta e momento adecuado pa tin un organisacion nobo sincero, un organisacion cu ta transparente y habri cu comunidad y e leyenda, e pakete cu Oduber ta bin cun’e y ta laga atras pa e ultimo 7 añanan di trabao ta loke mester representa e organisacion nobo. Traha duro, traha cu amor y pasion pa e pais aki. Esey ta loke nos tin mester. Hopi hende cu ta dispuesto pa traha 12, 14 ora pa e pais aki, tuma decisionnan y hiba e pais dilanti pasobra Aruba tin masha hopi mes pa ofrece si bo tin hende cu kier traha cu e pasion y amor pa e pais.
“Mi lo sinta cu ken cu ta pa traha pa Aruba den caso cu mester forma un Gobierno na 2017,” segun Oduber.
E ta sigui splica cu Oduber no lo wak atras. El a duna su comentarionan caba. Semper ora cu ta haci cambio, mester evalua esakinan pa nan no ta costa dobel of cu en todo caso ta e comunidad tin cu paga pe.
Hopi biaha politiconan, y a bis’e tambe riba un post cu el a haci riba Facebook, ta yega momento cu mester ta sincero y brinda e comunidad decisionnan cu ta hiba e famia, e individuo padilanti y no cu na e momento ey ta un tiki popular pasobra cu un grupo por ta no a aprecia e decision di pone un Aruparking den Centro di ciudad. A cana rond y hopi hende a bisa cu e decision di a cambia e orario naturalmente ta costa e mesun Gobierno, pasobra ta Gobierno tin cu paga pe na final. Esey ta nifica cu ta Pueblo ta paga pe y tambe ta crea atrobe e obstaculonan den centro di ciudad cu naturalmente. E fenomeno di parking rond mundo ta biba. Nos tur ta biaha, nos tur ta pag’e double, triple of 10 biaha mas hopi ora nos bay otro partinan di mundo. Gobernacion no ta unicamente participa cosnan bunita. Gobernacion ta tuma decisionnan tambe cu por ta na e momento ey ta duro, pero ta sigura e futuro di bo yiunan aki cinco, dies, 20 of 50 aña. Esey ta e balansa cu tin cu wordo busca ora cu ta atende un cartera, cual Oduber a haci den e caso cu el a carga como minister, prome labor y despues turismo, transporte, sector primario y cultura, pa tuma decisionnan cu tabata semper na beneficio, fastioso tin biaha, duro tin biaha. No tabata facil privatisa un ATA at all. Cinco minister a purba prome cun’e y nan no a logra. Awe e ta un di e institutonan mas fuerte cu tin, cu ta spera cu e dedenan keda leu di ATA. Un instituto manera ANSA cu a wordo lanta for di Directie Luchtvaart no tabata facil pa convence pa mustra con miho e por ta. Bo lo por core di biaha y bisa cu no kier problema, nan ta bay welga, miho lebomay y atrobe, ta perseverancia. Ta tuma decision pasobra cu sa cu cos ta bay ta miho pa futuro y a logra cu awe tin un departamento NV di ANSA sali for di e Air Traffic Controller for di Directie Luchtvaart cu ta genera ganashi di riba 1 miyon pa aña. Ta un departamento cu tabata costa so, sin ningun entrada. Un radar cu a firma pe y cu otro aña lo wordo instala. Decisionnan mester wordo tuma, mescos cu e decision na aeropuerto awor aki, cu ta un decision pa futuro. Inversion di casi 140 miyon dollar cu tin cu wordo haci pa loke ta trata e ampliacion di nos aeropuerto, pasobra nos turismo ta solido, nos turismo ta fuerte, nos ta mira e fenomeno di Venezuela cu naturalmente tabata sa di dje, cual lo sigui te Mei otro aña. Mientras tanto ta wak hotelnan ta sigui yen y nan grado di ocupacion ta mas halto compara cu aña pasa, apesar di e Venezolanonan cu ta cayendo. Tabata tin un strategia, un pulse caminda cu sector priva, hunto cu sector publico, mediante ATA a percura pa promocion di pais Aruba den Merca, Europa y resto di Latino America y cu ta sigui keto bay di ta e unico pilar economico di pais Aruba y cu ta convenci cu lo sigui carga e pilar aki tambe, segun Otmar Oduber.