DEN HAAG – Recientemente director di Kansfonds sra. drs. Henriëtte Hulsebosch
y director di Oranjefonds Sr. drs. Peter Douwes a haci un bishita di cortesia na Arubahuis. Esaki en bista di nan bishita pa Aruba planea pa dia 4 di Juli proximo. Sra Hulsebosch y sr. Douwes a wordo ricibi pa Minister Plenipotenciario Suplente sr. Eddy Paris.
Sr. Paris a elabora riba e retonan social na Aruba, contando un poco di e incidente tragico di algun luna pasa, net na entrada di e gobierno nobo, caminda cu dos mucha a bira victima di abuso domestico. Cu e ehempel lamentabel aki Sr. Paris a desea di enfatisa cu Aruba tin retonan social hopi grandi pa resolve, cu mester keda atende cu urgencia.
Minister di Asuntonan Social y Labor Sr. Glenbert Croes y su team a wordo poni mesora na altura pa sr. Paris over di e plannan pa contribucion di Kansfonds y Oranjefonds. Sr. Daniel Tecklenborg, Director di CEDE Aruba lo percura pa Kansfonds y Oranjefonds sinta cu Minister Croes durante di nan bishita na Aruba.
Di parti di Arubahuis nos kier a gradici di antemano e cooperacion di parti di sra. Hulsebosch y Sr. Douwes.