Appeltjes van Oranje 2017 ta focus riba mucha cu ta lanta den situacion vulnerabel. Cu e tema ‘Mucha Fuerte’, Oranje Fonds ta buscando organisacionnan cu ta pone man na obra pa e muchanan aki. Pa por gana e premio, un iniciativa mester yuda mucha cu nan desaroyo, drecha nan ambiente di biba of sostene mayor cu criansa di nan yiunan. Postulacion ta habri te cu 23 di September via oranjefonds.nl/appeltjes. Na Mei 2017 lo entrega Appeltjes van Oranje na tres organisacion ganado.
Vulnerabel
Mucha ta un di e gruponan mas vulnerabel den nos comunidad. E situacion den famia y nan ambiente di biba ta di gran influencia riba nan desaroyo. Afortunadamente den nos reino tin hopi iniciativa cu ta traha na un mihor desaroyo di mucha y famia. Por ehempel tin organisacion cu ta regla ‘buddy’, un compañero, pa mucha cu tin problema na scol of tin un atraso den nan desaroyo di idioma. Tambe tin cu ta yuda famianan den bario sostene otro famia cu de bes encuando mester di apoyo. Oranje Fonds ta buscando e ehempelnan bunita aki.
‘Balor invaluable’
Ronald van der Giessen, director di Oranje Fonds, ta splica: “Tur mucha mester haya e mesun oportunidadnan den bida. Pero pa motibo di factornan manera un situacion dificil na cas of un atraso di idioma, tin mucha cu ta keda atras. Iniciativanan cu ta yuda nan progresa den bida ta di un balor invaluabel. Nos ta buscando iniciativanan cu ta exitoso den nan manera di traha, cu ta yuda mucha desaroya nan mes y cu di berdad ta haci un diferencia den nan bida. Nos ta haci un yamada na tur proyecto cu ta haci esaki pa postula nan mes pa Appeltjes van Oranje!”
Appeltjes van Oranje
Tur aña Oranje Fonds ta otorga Appeltjes van Oranje na iniciativanan social cu ta trece diferente grupo di hende den nos comunidat hunto y cu exitosamente ta crea un ambiente habitabel. Cu esey nan ta un gran ehempel pa otro hende. E premio ta consisti di un escultura di brons, traha door di Prinses Beatrix, y un suma di € 15.000,-. Reina Máxima ta entrega e premionan tur aña na Paleis Noordeinde. Den añanan di lustro, Rey Willem-Alexander ta entrega e premio.
Oranje Fonds
Oranje Fonds ta sostene iniciativanan social na Hulanda y den e parti Caribense di Reino Hulandes. Den e aña cu a pasa e fondo a sostene 9.300 iniciativa cu un total di 31 miyon euro. Esakinan tur ta iniciativa cu ta percura pa hende topa cu otro, ta menos solitario, ta haya mas comprencion pa otro y ta haci algo pa yuda otro hende. Oranje Fonds ta ricibi apoyo financiero di entre otro Nationale Postcode Loterij, De Lotto, donacion individual y patrocinio di empresa. For di lantamento di Oranje Fonds, Rey Willem-Alexander y Reina Máxima ta e pareha wardador di e fondo.