CARACAS, Venezuela- E coalicion opositor Mesa di Unidad (MUD) di Venezuela a repudia e inscripcion di e ex gobernador Henri Falcon, pa enfrenta Nicolas Maduro den e eleccionnan presidencial di April, despues di a describi di proceso como un “farsa electoral”.
MUD a anuncia siman pasa cu e lo no participa den e proceso electoral pa considera esaki como “fraudulento” y “ilegitimo”, ademas di ta mucho lihe y sin garantia.
Pero Falcon, un disidente di Chavismo cu tabata forma parti di e agrupacion opositor, a inscribi su postulacion diamars ultimo y a pidi pa e fecha di e eleccionnan wordo pospone como parti di e serie di garantia electoral. Ademas, el a sugeri cu si e no cumpli cu esaki, e lo por bandona e campaña na mita caminda.
Analistanan a bisa cu Maduro tabata tin mester di un rival importante pa e eleccion por ta legal. E presidente, cu a yega na poder na 2013 despues di e morto di Hugo Chavez, diamars a reta su opositornan pa competi dia 22 di April.
Falcon, cu a referi diamars na Maduro, como e “candidato di hamber”, ta wordo cataloga pa e mandatario y pa Chavismo radical como un traidor, mientras cu algun opositor a bisa cu e ta hungando na fabor di gobierno door di enfrenta e presidente y valida e eleccionnan.
Un encuesta di e compania Datanalisis, publica e siman aki den un informe di e compania Torino Capital, a revela cu Falcon tin un nivel di aprobacion di 38% – abao di e lider opositor encarcela, Leopoldo Lopez, cu 40.4%, frenta e 26.1% di Maduro.
E sondeo a wordo realisa entre 1 y 14 di Februari entre mil persona y tin un margen di 3%.