VIENA, Austria – Minister di paisnan productor di petroleo dentro y pafo di opep, a reuni diaranson na Viena den un ultimo intento pa acorda e duracion di algun recorte den produccion di crudo.
E principal productor di OPEP, Saudi Arabia, a prefera di extende e recortenan na e bombeo den nuebe luna na luga di seis luna fiha inicialmente, pa acelera e ekilibrio di e mercado y evita cu e prijsnan di crudo cai bao di 50 dollar pa bari.
E miembronan di OPEP, Irak y Argelia hunto cu Risa -e principal productor pafo di e grupo- tambe ta apoya un extension di nuebe luna, pero algun miembro di OPEP den e Golfo Persico manera Kuwait y e Emiratonan Arabe Uni, a señala e necesidad di un analisis mas profundo.
E Organisacion di Paisnan Exportador di Petroleo, lo reuni formalmente na Viena diahuebs pa considera si mester prolonga e pacto alcansa na December bao cual OPEP y 11 pais no miembro, a acepta reduci e produccion na 1,8 miyon di bari pa dia durante e prome simester di 2017.
Diaranson, un comite ministerial di siguimento forma pa e miembronan di OPEP, Kuwait, Venezuela, Argelia, hunto cu e productornan pafo di e grupo, Rusia y Oman, a reuni den e capital Austriaco pa discuti e avance di e recorte y su impacto den e suministro mundial di crudo.
Saudi Arabia, cu tin e presidencia actual di OPEP, tambe lo asisti.
Varios delegado di OPEP, a bisa cu nan lo spera cu e reunionnan di diaranson y diahuebs ta relaticamente indoloro, loke ta resulta den un extension di e recortenan pa nuebe luna.
“Mi ta kere cu e reunion lo desaroya sin problema,” un delegado di OPEP a bisa, refiriendo na e señalnan di consenso den e grupo incluyendo Iran, cu a dal contra Saudi Arabia den varios cita reciente di OPEP. Varios delegado y minister a bisa cu nan no ta kere cu e recortenan por extende na un aña completo.
Fuente: http://lta.reuters.com