opendag
E Open Dag di Scol pa Polis ta ofrece un programa hopi interesante y dibertido pa grandi y chikito. Mescos cu aña pasa, nos futuro profesionalnan den e ramo di husticia ta habri porta di Instituto Policial Edgar J. Vos y invita pueblo di Aruba pa un tremendo celebracion di Dia di Betico.E programa di demostracion, unda cu polisnan specialisa lo duna un bista den nan trabao di tur dia ta cuminsa mañan mainta for di 10or di mainta y ta caba 3or di atardi. Ademas di e demostracionnan tin diferente otro actividad.

Publico, incluyendo muchanan, ta wordo invita pa participa activamente na algun di e demostracionnan, manera marchamento y ehercicio.

E Unidad Motorisa, Unidad K-9, “Mobiele Eenheid”, Team di Aresto, Team di Bicicleta y VIP Team lo duna demostracion di nan trabao. Tur mucha ta wordo invita pa saca potret bisti na uniform di polis y un caricaturista lo ta pintando caricatura pa nos muchanan como tambe pa adulto.

For di basta siman caba polisnan ta ocupa cu planea y pone hunto un “crime scene”, cual bishitantenan por analisa y muchanan cu presenta e solucion corecto lo ricibi un certificado special como recuerdo. Tambe lo tin un exposicion di arma.

Como bon anfitrion, nos Scol pa Polis a percura pa un bar y cushina bon surti y entrada pa e Dia di Famia ta completamente gratis.

For di 10or di mainta pa 3or di atardi instructornan di e diferente careranan den area di husticia, manera polis y cuidado di preso, lo ta presente pa duna informacion y ta ofreciendo inscripcion pa e opleidingnan aki. Esaki ta un bon oportunidad pa haya tur informacion tocante un carera den area di husticia, tanto pa e futuro studiante como nan famia.

Bishita e Open Dag di Scol pa Polis y disfruta di un dushi Dia di Famia riba Dia di Betico.