GENEVE, Suisa – E comisionado di e Organisacion di Nacionnan Uni (UNO), pa e Derechonan Humano, Zeid Ra’ad Al Hussein, a adverti diamars na e Gobierno Filipino cu pa duna polis e poder pa mata cualkier supuesto traficante di droga, ta afecta su sistema di husticia.
“E pueblo di Filipnas tin derecho na institucionnan hudicial imparcial cu ta opera cu e garantianan di e debido proceso y na un polis cu ta sirbi husticia,” e responsabel a bis den su discurso di inauguracion di e Conseho di Derechonan Humano, cu lo reuni durante e proximo tres simannan na Geneve, EFE a cita.
El a considera cu e declaracionnan di e presidente Filipino, Rodrigo Duterte, “di desprecio pa e normanan internacional y e principionan cu ta mantene e sociedadnan sigur.” Duterte a asumi e hefatura di e Estado na final di Juni ultimo cu e promesa di caba cu e problema di droga den su prome seis lunanan di gobierno.
For di e tempo ey, el a pidi varios biaha na Polis y ciudadanonan pa mata narcotraficante y drogadictonan.
Frente na e situacion aki, Zeid a pidi autoridadnan di Filipinas pa autorisa un biahe di trabao na e pais na e relator di UNO riba e ehecucionnan extrahudicial.
“Mi oficina ta cla pa apoya cu asistencia, incluyendo den temanan manera e tratamento di drogadictonan di acuerdo cu normanan internacional,” el a propone.
Ayera, e gobierno di Filipinas a cualifica di “exito” e campaña violento contra droga inicia pa Duterte, kende desde for di dia 30 di Juni a causa morto di casi 3000 supuesto narcotraficante: 1466 den operacionnan policial y 1490 den man di gruponan di “vigilante.”
Di acuerdo cu polis, mas di 16 mil supuesto traficante y consumidor a wordo deteni y 700 mil a entrega nan mes na autoridad y a reduci e suministro di droga den un 90%
Fuente: El Universal