Onix y Dulce Sueño a planta simiya na Aruba cu dos potro

Pa logra yega na un raza cada aña mihor ta depende di diferente factor. E bon estado di salud, e bon alimento, combina cu bon cuido y finalmente bon training y maneho ta ingredientenan indespensabel pa yega na un raza superior. Hecho ta cu tur cos mester start pa sembra e bon simiya y Aruba na e momento aki ta afortuna di tin reproductornan di paso fino di nivel halto. Asina mes pa trese variacion ta necesario pa busca sanger di razanan diferente.
E prome dos crianan cu a nace e aña aki ta e muestra palpable di esey. Den paso fino un potro di “Dulce Sueño” a mira luz y den troche ta un yiu di “Onix”. Ambos reproductor ta di moda na Colombia, basa riba nan resultado tanto den pista, pero tambe den e resultado di nan yiunan.
Dia 9 di Januari “Tartarina” a duna un bunita potro na Villa Floralina y e yiu di Dulce Sueño a hanya e nomber di “Rompe Corazones de Villa Floralina”. Tartarina ta e yegua gran campeona den tur e ultimo competencianan grandi, cu excepcion di Interpaso 2012, ora cu e mester a baha cabez pa Dulce Seduccion de la Ilusion di Colombia. Tartarina ta un yewa di e dos islanan, ya cu ela yega Corsow como portranca pasando Aruba di transito. Na Corsow nan a arende y despues Villa Floralina a cumpre y trese Aruba. Den man di Dairo Jimenez el a mehora considerabelmente. Dulce Sueño ta Fuera de Concurso, pero tambe e tin varios yiu cu a bira Fuera de Concurso.
Dia 11 “Gaviota de las Piedras” a duna luz na un potro na pesebrera di Penpeng Boekhoudt na Savaneta. E potro ta yiu di Onix, cu ta e reproductor di moda den trocha, siendo un yiu di e mihor yewa trochadora/galopera cu Colombia a conoce. Penpeng ta hopi impressiona cu Onix, ya cu esaki ta e segundo potro cu e tin di Onix. E prome ta den careda di 30 luna cu ela trese aña pasa di Colombia y pronto nan lo cuminsa arende.
E recien nasi ta di dos yiu di Onix cu ta nace na Aruba, ya cu e prome yiu ta “Amatista” cu a nace na Villa Floralina, como yiu di Onix den Teoria.
E aña aki atrobe tin basta cabai pa nace na Aruba y nos lo trata na tene e comunidad informa di e proceso di reproduccion segun nan presenta.