MADRID/LISBOA- Centenares di candela ta asotando e parti nort di Spaña y centro y nort di Portugal. Esaki ya caba a causa morto di por lo menos 35 persona.
Di e victimanan aki, 31 a fayece den teranan Portugues, segun autoridadnan di proteccion civil a informa prensa Portugues.
Cuatro persona mas a perde nan bida den e comunidad autonomo di Galicia, segun e agencia EFE.
Autoridadnan Gallego a sigura cu durante e mainta di dialuna al menos 105 candela ainda tabata activo, di cual 15 di nan tabata forma menasa pa e zonanan pobla. E candelanan a yega te na Vigo, ciudad mas pobla di Galicia.
E situacion ta ainda mas dificil na Portugal, caminda cu diadomingo autoridadnan a raporta 523 siniestro, di cual mas di 100 tabata activo ainda ariba dialuna mainta.
Mas di 6 mil efectivo Portugues y 5 mil persona na Spaña ta participa den e lucha contra di e candela.
Prome Minister Portugues, Antonio Costa ya caba a anuncia estado di calamidad publico.
E speransa di hopi hende ta cu al menos e awasero leve cu ya caba a wordo raporta den algun zona di Galicia intensifica. Esaki lo yuda tanto brandweer como e boluntarionan cu ta combati e candelanan na ambos banda di e frontera.
Fuente: http://www.bbc.com