Algun dia pasa a tuma luga un evento organisa pa Organisacion Caballista Arubano (OCA) cu e meta pa celebra y felicita tur su amazona y jinetenan di e seleccion 2016. Na mes momento a haci uso di e oportunidad aki pa entrega un certificado di reconocimento pa nan bunita presentacion y nan logro durante e Mundial XI cu a tuma lugar na Puerto Rico na luna di Juli 2016.
OCA su seleccion tabata consisti di 12 amazona y 6 jinete di edad cu ta varia di 12 pa 23 aña.
Nan preparacion a cuminsa na luna di Januari e aña aki cu diferente ehercisio tanto individual pero tambe den grupo pa asina ta miho prepara pa un Mundial di equitacion, cu ta e nivel mas halto den e disciplina aki.
OCA tambe a usa e momento special di celebracion y reconocimento pa duna un danki na Gino Werleman cu tabata e persona encarga pa hunto cu su grupa guia e seleccion cu a traha hopi duro durante 6 luna largo pa asina representa Aruba di e miho forma.
Un danki special tambe ta bay na tur e coach di Aruba cu tabata involvi den e preparacion den un of otro forma. Mas cu claro un danki tambe na tur e mayornan, famia y amistad cu a duna e muchanan tur e apoyo y confiansa.
Aruba a logra gana 1 medaya di oro cu Melanie Wever, 1 medaya di Brons cu Willem Werleman, 1 di tres luga cu Elizabeth Johnson, 1 di cuater luga cu Alina Mansur, y 1 di cinco luga cu Zoey Arends.
E siguiente Mundial di equitacion pa Amazona y Jinete ta programa pa tuma luga na Merca den 2018.
Pa mas informacion tocante e actividadnan di OCA, sigui nos riba facebook na Org. Caballista Arubano of tuma contacto cu [email protected]