C

Un hoben, su ruman y un amigo a hiba susto di nan bida y a keda babuca ora cu el a bay saca potret di e bunita luna cu tabata acompaña di e planeta Jupiter cu tur hende na Bonaire por a mira facilmente sin uso di telescoop Pasco atardi y anochi, esta 25 di december 2012 ultimo. E hoben aki su mama a pidie pa saca un potret di luna p’e pasobra e tin un telefon cu camara mas sofistica. Na momento cu e hoben aki, Ziggy Mansveld  a saca e prome potret cu su Iphone pa mand’é pa su mama el a spanta pa e obheto straño den laira cu a sali riba su foto. Tabata trata di un obheto cu tin tur indicashon cu por ta un UFO òf OVNI manera nan ta yam’e na spaño.  Ora a pidie pa mesora saca un foto mas pa mira si no ta trata di un sushi riba e lèns di su camara, ta resulta cu atrobe e mesun obheto a sali pero posishona mas halto y na man robes riba e foto. Casualmente e hoben aki su ruman muher mayor tambe a saca un foto na mes momento cu esun prome pero den su ansha y spanto a ‘delete’ esaki mesora. Un amigo di Korsou cu tabata di vacacion serca nan na Bonaire tambe ta testigo di e suseso misterioso aki, y tur tres a keda den un ansha y totalmente asombra di loke nan a mira.  No sa si e UFO tabatin algo di haber cu e planeta Jupiter cu tabata hopi serca di luna e anochi ey y cu a haña atenshon tambe den corant. Mes un anochi a tuma contacto via Internet cu un organisashon Mericano ‘UFO Case Book’ cu ta studia, sigui y reporta tur aparicion di obhetonan no identifica cu ta aparese rond mundo den firmamento of cosmos manera nan ta yama esaki tambe. E fotonan saca pa Ziggy Mansveld ta di hopi bon calidad y ta ilustra claramente un obheto den forma di un ‘vliegende schotel’. E fotonan aki a keda manda Merca pa nan keda analisa pasobra ta trata di un dje poco imagen nan asina serca di un obheto no identifica. Tin hende ta pensa mesora cu por ta trata di ‘photoshop’ pero algun persona cu conosemento di fotografia a bisa cu e foto no ta drecha via photoshop. Na momento cu a tuma contacto cu UFO Case book, un di e tantisimo organisashon cu ta studia e materia aki, a pidi e  webmaster pa duna nos informacion si tabatin mas persona cu a notifica algo similar riba mes un dia entre 18:10 y 18:30. Ta wardando riba nan contesta pero riba Google por nota cu dia 25 di december ultimo tabatin mas aparishon na otro partinan di mundo. E atardi laat  y nochi di Pasco aki shelo tabata bastante liber di nubia y por a mira e planeta banda di luna cla cla. Potret 1 saca 18:15 ta ilustra e UFO den sentro flotando net riba luna y foto 2 ta mustra con el a move mas na man robes y foto 3 saca 18:23 ta mustra cu e opheto ya a disparse.  UFO Case Book ta un organisashon independiente y ta tuma tur reporte na serio.  For di e ultimo corespondencia via email nan a informa cu nan ta analisando e caso aki y nan ta den contacto cu mas investigador riba e tereno  aki pa fortifica e notificashon cu a keda haci. Pa medio di e comunicado aki nos kier hasi un yamada na cualkier persona cu tambe a nota algo straño Pasco anochi entre 18:10 pa 18:30 sea na Bonaire, Kosou of Aruba pa por fabor tuma contacto cu Byron Tromp na +599 7850333 of +599 7867867 of email byrontee2002@yahoo.com. Na momento cu e organisashon ariba menshona manda mas informacion, nos lo publica esakinan mesora. (redaktá pa: Byron Tromp)