Den opinion di Joselin Croes e problema di criminalidad na Aruba ta e maneho migratorio na Aruba.
E no ta pa punta dede riba ningun persona ni tampoco ningun departamento pasobra ta hopi gobierno y gobernante a bin y a bay y nunca ningun a bin cu un vision of plan pa para of beperken di e imigrantenan cu ta bin Aruba. No a traha un maneho cu ta bisa ken nos kier pa imigra na Aruba, di unda nos kier pa nan bin, ki edad nos kier pa nan tin, ki nivel social nan mester tin, ki nivel di educacion nan mester tin. Nunca tabatin un maneho ni un database cu por duna Aruba un indicacion ki tipo di persona a imigra durante e ultimo 50 añanan.
Durante e ultimo 50 añanan Aruba a importa mas di 40,000 persona. Esnan cu a bin entre aña 1986 y 2000 a conoce temponan cu Aruba ainda tabata creciendo den turismo y na unda e turismo Venezolano ainda tabata booming. Pero e grupo cu ta drentando e ultimo añanan ta pasando duro hunto cu e Arubiano pasobra comercio a cay, no tin cupo di trabou habri cual ta conduci na criminalidad. Claro abuso di alcohol y droga cu tambe ta bin di problemanan social tambe ta yuda e criminalidad.
E ta cla y raspa cu pueblo no kier pa Aruba bira un otro Miami cu puro edificio, ta Spaño so nan ta papia eynan y criminalidad ta na ordo di dia. Aruba y e pueblo a lanta duro vooral e medio ambientalistanan a para fuerte y bisa enough with all the construction and destruccion. E pueblo kier pa aki 10 aña tin tereno pa nan yiunan por traha cas. Pa tin scol na unda nan nieto por sinta den un klas no di 35 mucha pero di 25 mucha. Na unda ora nan yiunan caba di studia tin trabou pa nan. Na kier por bay beach y tin espacio pa nan sinta den tur trankilidad. Nan kier respira aire puro, nan kier pa ora nan sali riba caya nan ta safe, nan kier un calidad di bida halto.
Si Gobierno di Aruba no bin cu un formula pa balansa e crecemento economico di pais Aruba e lo tin como consecuencia cu pa aki 10 aña no ta bay tin lugar pa nos yiunan di tera bin bek, no ta bay tin scol drechi pa nan yiunan, no ta bay tin luga pa pone auto y criminalidad lo bira un custumber. Joselin ta convenci cu esaki no ta loke Arubiano kier y un biaha mas e ta enfatisa cu Arubiano ta tur esnan cu ta bibando na Aruba di un forma legal. Nan tambe ta pidiendo pa proteha locual tin awor. Nan tambe a traha duro pa logra Aruba para op eigen benen, nan tambe kier pa nan yiunan por construi un cas ora nan bolbe.
Mester bin un maneho estricto di imigracion. Mester bin un control severo di tur e tantisimo hendenan cu ta kedando na Aruba di un forma ilegal.
Dia nos cuminsa controla y duna boet na tur esnan cu ta traha of emplea trahadornan ilegal e dia ey nos tin un chens di para esaki.
Mester POR proteha nos pais y nos hendenan. Nos mester por percura pa nos yiunan por haya un bon trabou ora nan caba di studia, por construi nan propio cas, por habri nan mesun negoshi, por biba den un Aruba liber di criminalidad, por gosa di nos beachnan, camindanan, naturalesa y nos Papiamento cu poco poco ta bay perdi.
E ta nos deber pa haci esaki y e unico forma ta pa bin cu un maneho estricto di imigracion pa Aruba y bin cu un control severo riba ilegalidad na Aruba. Nos ta man habri pa bon hendenan cu kier bin biba na Aruba pero pa esnan cu kier bin haci nos isla daño y kier haci nos hendenan daño nos porta ta cera.