Nubia scur colga ariba e regreso riba escenario di Shakira

0

BARCELONA, Spaña- “Ta duelmi hopi di informa boso cu lo mi no por canta e dianan 10 y 11 di November na Paris, ni 12 na Ambers y 14 na Amsterdam. Mi ta sigui concentra ariba mi recuperacion total pa por comparti e show aki cu mi a prepara cu tanto ilusion y di cual mi ta sintimi orguyoso. Dios mediante nos lo topa pronto na comienso di mi gira”, e cantante a bisa, kende a bisa cu e ta sufri di un ronkiyo, debi na e intensidad di e trainingnan pa su gira nobo.
E causa extra oficial ta añadi mas cos. E Dorado World Tour ta un di e giranan excesivo cu solamente artistanan di elite manera Shakira por haci, apoya pa e todopoderoso Live Nation. Aunke ainda no tin fecha, e gira lo dura rond di 6 luna cu lo hiba na bishita gran parti di Europa, Norteamerica y Latinoamerica. E gira ta full bendi na Spaña y ta purbando pa reschedule tur e conciertonan cu a keda cancela. Tin cientos di personanan involucra, miyones di dollar ta den wega.
E strea Colombiano ta bisa cu door di un ronkiyo pa pospone e comienso di su gira mundial, El Dorado World Tour, pero tin mas motibo.
Shakira ta wordo ataca desde varios fuente, e no por ni subi su auto. E aparicion di su nomber den e asina yama Paradise Papers ny tambe door di e hecho di no kier separa su mes di su yiunan na un momento asina delicado, a pone stop e makinaria. E investigacion mundial Paradise Papers ta basa ariba e analisis di 13,4 miyon di documentonan procedente di dos proveedor di servicio offshore di Bermuda y Singapore y 19 registro mercantil di jurisdiccion skur. E filtracion, obteni pa e corant Aleman Süddeutsche Zeitung, cual ta un trabao en conhunto cu e Consorcio Internacional di Periodistanan di Investigacion y na Spaña, el a sali den El Confidencial y La Sexta.
Según dicho investigacion, Shakira a transferi su derechonan for di Luxemburg pa un compania na Malta, Tournesol Limited, na Juli 2009. E sociedad Maltes a aumenta su capital den un euro, pero cu un prima di emision asocia di 31.637.050 euros, cual ta e ekivalente na su “activonan musical, derecho intelectual y marca”. Na Malta, e accionista di companianan cu no ta biba eynan, ta paga solamente 5% di belasting. Un ganga.
No tin nada ilegal den esey, semper y cuando e cantante tin tur su obligacionnan fiscal na ordo, algo cu Ezequiel Camerini, su abogado, a confirma. Pero e existencia di e sociedad ey, como tambe e hecho cu Shakira tin su fortuna parti tur rond mundo (tambe na un banco Suizo), a bira publico despues di su separacion di Antonio de la Rua. E cantante y e yiu di e ex presidente Argentino tabata tin un relacion di mas di dies aña, un union cu a coincidi cu e consolidacion di Shakira como strea internacional. Mientras cu Shakira tabata traha y traha, Antonio a zorg pa traduci Shakira su esfuerzo den placa. Ora cu nan a separa, e romeo bandona a demanda Shakira pa 100 miyon dollar pa supuesto beneficionan di nan union comercial (no sentimental). E mas interesante di e demanda ta cu catalogo di paraisonan fiscal cu a wordo cita.
A pesar di cu Shakira no kier wak de la Rua ni den pintura, toch e no ta deshaci di e cooperacion ora cu nan a separa. Den e sociedadnan offshore ela cambia e nomber di Antonio pa esun di Camerini. Aunke cu Shakira tin shete aña bibando na Barcelona, cu Gerard Pique y nan dos yiunan, su residencia oficial ta na Bahamas ainda, caminda e tabata tin su nido di amor cu de la Rua.
Pero e cantante no a bolbe comete e mesun fout y e no a involucra e futbolista Gerard Pique den niun di su negoshinan.
E imagen di Shakira, impecabel te cu awo, lo por debilita di cara na su contratonan publicitario, aunke den e capitulo aki, el a debilita un poco. E no ta e imagen mas di Activia, ni de Oral-B, y su contrato cu Fisher Price ta caba fin di aña. E ta mantene relacion comercial solamente cu Costa Cruceros y cu famia Puig, cu ta gestiona su liña di perfume. Tampoco e ta aparece den e lista di Forbes di muhenan mas poderoso di mundo (na 2015 el a ocupa e puesto nr. 81).
Paraisonan fiscal, ruptura di sentimental, un gira mundial emergente, Shakira parce di ta den e wowo di horcan, aunke esunnan cu conoce sa cu tanto e como su pareha, Gerard Pique, loke ta preocupanan mas ta nan yiunan. Desde Roc Nation, su poderoso agencia na New York, nan ta prefera di no haci comentario y ta apoya e version oficial di e ronkiyo. Si e strea Colombiano no por cuminsa su gira, toch su lombanan ta cuida. Según e lista di propiedadnan cu ta sali ariba dicho demanda cu de la Rua, ademas di e isla na Bahamas, Shakira lo tin un zolder na The Big Apple (New York), un mansion luhoso na Capri, otro mansion na Miami y varios propiedad na Nassau, Republica Dominicana, Barranquilla y Punta del Este. Ademas di esakinan, mester conta e tres casnan cu el a traha cu Pique na Barcelona y Pirineo. Durante varios aña e cantante a purba bende su cas na Miami pa 11 miyon euro, sin éxito.
Si tur cos bay bon, Shakira lo cuminsa su gira mundial diahuebs 16 di November na Montpellier. Mientras tanto, e lo keda reclui na su cas di Barcelona, cuidando su famia.
Fuente: www.elmundo.es

 

LEAVE A REPLY

Please enter your comment!
Please enter your name here