Kralendijk Boneiro: Riba djabièrnè 26 di mei, den oranan trempan di mardugá a detené un hòmber di inisialnan V.K.N.P. riba Kaya Lodewijk Gerharts, den besindario di un establesimentu nokturno, pa butamentu di ‘fever’ i kore sin reibeweis. Mas lat riba e mesun dia a drenta keho di kiebro den un kas situá na Bulevar Gobernador Nicolaas Debrot. A bai ku entre otro un oloshi di marka Nautico i sèn kèsh. E kiebro a tuma lugá entre 8.30 or i 10.15 or di anochi.
Riba djasabra 27 di mei a drenta keho di ladronisia di un pikòp kolo blanku di marka Isuzu, numerá V-300. E pikòp tabata stashoná na lòk na un akomodashon turístiko situá na Bulevar Gobernador Nicolaas Debrot. A bai ku e pikòp entre 8.30 or i 11.30 or di anochi. Riba djaluna 29 di mei alrededor di 7.30 di mainta a topa ku un pikòp blanku den besindario di Kaya Nikiboko Nort. Tabata trata di e pikòp en kestion. A notifiká e doño pa e buska e pikòp.
Riba djadumingu 28 di mei a drenta keho di ladronisia di kuater tapa di wil for di un outo ku tabata stashoná riba e tereno di stashoná patras di misa di Playa. Tabata trata di kuater tapa di wil kolo shinishi ku diseño di ‘Yaris’ riba tur kuater. E ladronisia a tuma lugá entre 7 or I 9 or di anochi.