Noticia Policial di Boneiro loke a pasa entre 6,7,8 y 9 Januari 2017

0

Kralendijk Boneiro: Aki ta sigui e noticianan policial for di Boneiro.

Aksidente ku outo i bròmer riba Bulevar Julio A. Abraham
Riba djaluna 9 yanüari, pa mas o ménos 7.45 or di anochi, un aksidente entre un outo i un bròmer a tuma lugá riba Bulevar Julio A. Abraham. E outo ke a kita bai na su  man robes na entrada di un hotel i no a mira e bròmer ta bini, ku konsekuensia ku e bròmer a dal den su porta patras na banda drechi. A transportá shofùr di e bròmer  ku ambulans pa hospital pa tratamentu médiko.

Ladronisia di trailer di boto na Bulevar Julio A. Abraham
Riba djaluna 9 di yanüari a drenta keho di ladronisia di un trailer di boto. E trailer di boto tabata stashoná, huntu ku 2 trailer di boto mas, riba un tereno di stashoná riba e kaya ariba menshoná. A bai ku e trailer kolo pretu , di 5 meter largu, entre djadumingu 8 di yanüari, pa mas o ménos 7 or di anochi, i djaluna 9 di yanüari, pa mas o ménos 7 or di mainta. Ta investigando e kaso.

Ladronisia di skuter na Kaya Nikiboko Suit
Riba djadumingu 8 di yanüari a drenta keho di ladronisia di un skuter. Ta trata di un skuter di marka Gilera Runner kolo pus/shinishi/blou. A bai ku e skuter, ku tabata stashoná den kura patras di un kas situá na Kaya Nikiboko Suit, riba djasabra 7 di yanüari, entre 6 or di atardi i 11 or di anochi. E kaso ta bou di investigashon.

Sambuyadó ta fayesé
Riba djadumingu 8 di yanüari den oranan di mèrdia tabatin un  aksidente di buseo na un sitio di sambuyá situá na Kaya Internashonal.  E víktima lo a konfrontá  problema durante di buseo i mester a keda reanimá. Ambulans ku a yega  na e sitio di e insidente, ku urgensia  a transportá e víktima  pa hospital pa tratamentu médiko. Algu promé ku 11 or di anochi a risibí e informashon ku e sambuyadó a fayesé. Ta trata di un hende hòmber prosedente di Estados Unidos, nasé riba 12 febrüari 1971.

Destrukshon di vehíkulo na Kaya Finlandia
Riba djadumingu 8 di yanüari den oranan trempan di mardugá tabatin un kaso di destrukshon na un vehíkulo den Kaya Finlandia. Deskonosínan lo a tira vürwèrk  den un outo di famia ku tabata pará  den kurá  di un kas. E vürwèrk a kousa daño material supstansial na e vehíkulo. Polis ta investigando  e kaso di destrukshon aki.

Intento di robo armá den Kaya Grandi
Riba djasabra 7 di yanüari a drenta keho di un intento di robo armá. Tabatin dos vehíkulo para dilanti di esun di e víktima den Kaya Grandi, ora ku un di e vehíkulonan a bèk dal den outo di e víktima i un hòmber ku arma di kandela a baha for di e otro outo. E víktima a bèk ku su outo i logra hui. E kaso ta bou di investigashon.

Kiebro na Kaminda Gurubu
Riba djabièrnè 6 di yanüari a drenta keho di ladronisia den un kas situá na Kaminda Gurubu. A bai ku entre otro un lèptòp i un kargadó di un kámara di sambuyá. E kiebro a tuma lugá entre 9.30 or i 11.45 or. Ta investigando e kaso.