Nos pais ta parce un barco sin capitan

0

Awe nos pais ta parce un barco sin capitan, navegando den lama bruto sin direccion. Segun Parlamentario Dangui Oduber di MEP, nos pais durante ultimo decadanan a conoce diferente generacion di lider cu cada un riba nan tereno a sacrifica nan tempo y famia pa traha incansablemente pa nos dushi Aruba por supera e olanan halto su dilanti y progresa. Nos hubentud tabata tin e oportunidad pa studia cu hopi motivacion pa logra nan metanan y bolbe bek pa contribui.
Sinembargo awendia kico a pasa? Mi ta topa cu hopi hoben mescos cu mi y nan ta haci mi e pregunta aki, kico ta pasando ultimo añanan. Nan no ta sinti motivacion pa nan futuro y ni pa bolbe bek si nan bay afo pa studia. Ora mi contesta e pregunta aki e contesta ta obvio; no ta cuestion di kico a pasa, sino ta mas bien kico no a sosode den nos comunidad.
Awe Aruba tin un Gobierno cu a perde autoridad y firmesa, un Gobierno cu practicamente no tin liderasgo cu ta sirbi e comunidad sino mas bien nan mes of interes di nan campañado y gruponan di interes. Pues ausencia di un Gobierno cu autoridad a crea efectonan negativo cu awe nos pueblo ta sufri e efectonan.
Pueblo ta bibando e efectonan aki den su bida priva y social. Sea bo ta bay banco, trabao, haci compras den ciudad, bay beach of bay recrea bo ta sintibo insigur pasobra delicuencia a logra penetra. Nos pilar economico mas importante tambe a bira victima regular di criminalidad manera nunca antes. Sinembargo e manera di traha di e Ministro di husticia a keda mescos, culpa otro y un excusa tras di otro pa hustifica su maneho sin autoridad. Por bisa cu awe nos tin un Ministro di excusa y no di husticia.
Recientemente a tuma luga un otro caso di asesinato dilanti nos hotelnan, ni 100 meter leu di camber di nos huespednan. Ningun musca a bula, e mesun siman atraconan ta sigui azota nos poblacion, marando yiu y mayornan den nan den cas. Ningun musca ta bula atrobe. Enves cu nos pais tin Ministernan cu ta interveni den asuntonan pa resolve e problema y menasanan cu nos pueblo y bishitantenan tin cu soporta nan a scoge pa pone atencion nan nan mes. E siman aki atrobe dos atraco den menos di 24 ora y hasta menasa di secuestro di un baby sino duna e atracadornan placa. Pueblo di Aruba ni den su propio cas no tin paz y trankilidad mas. Esaki ta algo grave cu nunca a pasa nos den nos pais. Di unda ta sali delincuencia por cambia bida den comunidad y hasta den nos propio cas.
Pesey mi ta bisa no ta cuestion di kico a pasa, mas bien ta kico no a pasa,
No a duna liderasgo, atencion y accion pa pevencion di crimen den nos comunidad. E ministro di asuntonan social awe no tey pasobra cu e tambe a sigui su coleganan y no a pone prioridad robes.
Pero awe mi kier bisa un y tur, Ami Dangui Oduber, hunto cu mi coleganan di partido lo pone un punto final na e decadencia aki di falta di liderasgo y autoridad. Nos lo restablece orden den nos barionan y proteha nos industria turistico y economia engeneral di Aruba.

Enbes di excuus nos lo tin un compromiso firme pa atencion, accion y esfuerso maximo pa combati criminalidad y restablece trankilidad y felicidad pa nos pueblo y nos bishitantenan.
Nos lo traha cu tecnologia modern manera “Crime Fighting Drones” Nos lo introduci un sistema di mobile crime prevention cu comunicacion avansa pa asina expande capacidadnan pa prevencion y represion di nos cuerpo policial.
Nos lo traha y sirbi nos pais incansablemente pa pueblo por tin oportunidad pa traha cu optimismo, hubentud studia cu inspiracion y despues di trabao famianan por biba normal y recrea cu nan yiunan y anochi sosega anochi cu trankilidad.

LEAVE A REPLY

Please enter your comment!
Please enter your name here