Nos hobennan tambe ta promotornan di paz den comunidad

0

En conexion cu ‘Dia Internacional di Hubentud’, Minister di Asunto Social, Hubentud y Labor, Angel Bermudez ta felicita tur hoben y tambe ta recorda nan cu nan tambe por contribui grandemente na e desaroyo di nos pais riba cualkier tereno cu nan ta desea.
E mandatario a splica cu hubentud actualmente ta e grupo di mas grandi den e generacionnan cu tin mundialmente. Nacionnan Uni ta reconoce cu hobennan awendia ta hunga un papel fundamental como promotornan di cambio, prevencion di conflicto y na mes momento sostenedonan di paz, pa es motibo tambe e tema di e aña aki ta ‘Hubentud Pa Paz’.
“Mirando tur e problematica cu tin rond mundo, sigur e ta importante pa hobennan ta envolvi den proceso di solucion riba cualkier tereno pero specialmente como promotornan di paz”, asina Minister Bermudez a expresa.
Asociacion Trabou di Hubentud (ATHA) conhuntamente cu Ministerio di Asunto Social, Hubentud y Labor pa algun aña caba ta reconoce hobennan cu ta destaca den nos comunidad mediante e programa “Poder di Hubentud”. Dialuna proximo e evento special di “Poder di Hubentud” ta tuma luga y Aruba ta cera conoci cu e hobennan cu wordo nomina y cu a destaca den nos comunidad.
Minister Bermudez ta sigura cu durante e ultimo añanan, e programa aki ta dunando bunita resultado. Banda di reconoce e hobennan cu ta destaca riba nos isla, e comision di “Poder di Hubentud” ta yuda forma e hobennan pa ta personanan cu meta grandi pa futuro, nan ta contribui na educa e hobennan riba e importancia den kere den nan mes.
“E ta importante pa tur hoben considera bon nan futuro. Kico nan kier logra den nos comunidad, cua funcion nan kier ehecuta, e contribucion nan kier duna na nos comunidad, e papel nan kier hunga y specialmente si nan ta sinti nan mes yama pa hunga un papel ehemplar pa otro nan”, asina e mandatario a splica.
E mandatario a sigui bisa cu e ta importante pa nos hobennan compronde cu nan tambe tin un responsabilidad cu e siguiente generacionnan. “Mi ta entusiasma pa conoce e hobennan cu a keda nomina e aña aki pa Poder di Hubentud y sigur pa duna nan e reconocimento bon mereci”, asina Minister Bermudez a expresa.