CARTAGENA DE INDIAS, Colombia – Cu un “baligrafo” (un bala converti den un pen), e hefe di estado Juan Manuel Santos a firma diahuebs den teatro Colon cu e lider di FARC, Rodrigo Londoño, e acuerdo nobo di paz apesar di e victoria di “No” durante e referendum y cu e sectornan di oposicion ta den desacuerdo cu e tratado aki.
E presidente Colombiano a tuma e palabra pa bisa na e Colombianonan cu e lo traha duro pa uni henter e pais rond di paz, pa asina tin un acuerdo nacional idoneo.
“E acuerdo mehora aki y ahusta ta incorpora e mayoria inmenso di e propuestanan pero ta mantene e esencia di e di e firmamento na Cartagena,” Santos a indica sentenciando cu: “nos a firma dilanti e pais y mundo un acuerdo nobo di paz cu FARC, esun definitivo.”
E proximo paso lo yega na un acuerdo nobo di paz, firma dilanti Congreso pa cuminsa cu e discusion riba e implementacion y refrendacion di e tratado aki.
Forzanan Arma Revolucionario di Colombia (FARC) y Gobierno di Santos a seya e acuerdo nobo di paz aki algun siman atras, despues di a renegosha pa inclui propuestanan di oposicion den e pacto original, cu a wordo rechasa den un referendum dia 2 di October ultimo.
Fuente: NTN24