Pa di dos aña consecutivo Noord Stars Pizza Hut DT ta logra triunfa como e miho ekipo di domino na Aruba. Diasabra anochi den un stadion di Riverplate yena cu fanaticada di domino, e ekipo cora no laga ningun duda atras y ta gana un otro titulo campeonil den domino
Diabierna anochi den e prome wega di final den e best out of three, Noordstars ta gana Xtreme DT cu e score di 13 – 8. Diasabra e ekipo di Xtreme DT mester bini brk pa asina forza un wega mas, pero Noordstars tabata tini otro idea y a bini dicidi unda nan ta gana Xtreme cu e score final di 13 – 3 y asina prolonga nan titulo. Den e wega pa di tres y cuater lugar, e legendario ekipo di Old Parr a logra un di tres lugar ora nan ta gana Trappers DT cu e score di 13 – 2 mientras diabierna caba Old Parr ta logra triunfa 13 – 8.
Na final e cuater ekiponan a haya nan respectivo trofeo for di man di e presidente di Aruba Domino Bond, sra. Soraida Boekhoudt. Di aki banda kier a manda un palabra di felicitacion pa Noordstars cu nan titulo di campeon y mas cu claro tur e 9 ekiponan participante na e campeonato organisa pa Aruba Domino Bond.
Un danki sigur na Lotto, e Loteria di Aruba pa medio di Comision di Subsidio cu a subsidia e campeonato di Aruba Domino Bond.
Cumprando weganan di Lotto, e Loteria di Aruba bo ta contribui na deporte riba nos isla. Meta di e fundacion ta pa organisa loteria, cambia bida di su hungadonan y na mes momento inverti den deporte local pa medio di donacionnan na e Comision di Subsidio.