Pyongyang, NOORD- KOREA- Dialuna Noord- Korea a manda un advertencia bisando cu e lo responde na “actonan imprudente di agresion” di parti di Merca, cu cualkier metodo cu Merca kier, mientras cu barconan di guera Mericano ta dirigi nan mes pa e Peninsula di Korea.
Pentagono a manda USS Carl Vinson, di 97 mil ton, cu un escolta di crucero di misilnan di guia y dos destructor, despues cu Noord- Korea a haci otro prueba di misil siman pasa.
Segun un declaracion duna na CNN door di funcionarionan di Pyongyang, e “situacion actual deplorabel” ta hustifica capacidadnan di autodefensa y di atake preventivo cu forsanan nuclear den su centro”.
“Nos ta haci Merca plenamente responsabel di e consecuencianan catastrofico cu por wordo provoca pa su actonan imprudente”, segun e declaracion.
Ta wordo spera cu pa diamars, e lider di Noord- Korea, Kim Jong Un, lo asisti na e Asamblea Popular Supremo, un reunion di perfil halto di e figuranan mas importante di e pais. E reunion ta bin dianan prome cu e celebracion di e cumpleaños di e fayecido lider, Kim II Sung, welo di Kim, dia 15 di April. Esaki ta bin mei mei di speculacionnan cu Pyongyang lo celebra e ocasion aki cu un prueba di misil of posiblemente un dispositivo nuclear.
Cu mas di 5 mil marino y 60 avion, USS Carl Vinson ta wordo compaña pa destructornan di misilnan guia pa USS Wayen E. Meyer y USS Michael Murphy y e crucero di misilnan guia Lago Champlain.
E barco y avionnan ta duna un potencia di candela y capacidad di atakenan importante y capacidad di atake significativo pero balanceando e opcionnan militar disponibel di represalianan di parti di Noord- Korea , esaki por ta un scenario complica pa e president di Merca, Donald Trump.
China, e aliado mas cerca di Noord- Korea, a presiona Merca pa cuminsa negociacionnan diplomatico directo cu Noord- Korea.
Secretari di Estado, Rex Tillersona a bisa diadomingo cu Beijing ta compronde e peligernan cu e programa nuclear di Noord- Korea y cu e ta di acuerdo cu tin cu tuma medidanan pa stop eaki, pero China no a mustra señalnan di niun camnbio den su focus riba Pyongyang desde e reunion entre e President Trump y Xi Jinping siman pasa.
Hopi di e analistanan ta kere cu e movimento di e barconan di guera di Merca probablemente lo ta di naturalesa defensivo, preparando su mes pa un scenario unda cu e grupo di atake Vinson lo por wordo yama pa realisa un intercepcion di misilnan. E tres barconan di guera di escolta cu ta biaha cu Vinson ta ekipa cu e sistema anti- misil Aegis, segun Bruce Bennett, analista di defensa di think thank Rand Corp.
Gobierno di Trump a sugeri e idea di haci cierto atakenan preventivo contra di Noord- Korea, pero e alcance y e metodo di posibel atakenan ofensivo ainda no ta duidelijk.
Pero e forsa aereo ariba di e barco Vinson no ta optimamente ekipa cu e armamento necesario pa un atake contra di e programa nuclear di Pyongyang, algo cu e analistanan ta considera dificil.
“Door cu Noord- Korea tin gran parti di su activonan bou di tera, lo ta dificil pa e grupo Vinson haci mucho daño na Noord- Korea”, segun Bennett.
Fuente:www.cnnenespanol.com