PYONGYANG – Noord Corea a lansa tres misil balistico e mainta di dialuna (ora local) desde e provincia di Hwanghae Nort pa e Lama di Hapon, segun e Ehercito Sur Coreano a informa.
E lansamento nobo aki a tuma luga poco menos di dos siman cu Pyongyang a lansa un misil balistico desde un submarino. E misil ey a drenta, pa prome biaha, den e zona di identificacion di defensa Aereo di Hapon.
Tambe a yega na un momento potencialmente embarasoso pa e unico aliado real di Noord Corea, China, cu actualmente ta anfitrion di e cumbre G20 na Hangzhou.
E presidente di China, Xi Jinping, a bisa na su homologo di Sur Corea dialuna cu Beijing ta opone na e despliege di e sistema di defensa antimisil Mericano THAAD na Sur Corea, segun e agencia di noticia oficial Xinhua.
E proposito declara di e sistema THAAD ta e defensa di Sur Corea pa loke ta e atakenan di misil desde su bisiña di nort.
Sur Corea a anuncia e despliege di e sistema di misilnan na Juli, pero ainda e no ta den funcionamento.
Condena di Hapon y Merca: China ta yama pa calma
Den un comunicado, Merca a condena “energicamente” e lansamentonan, cu un alto funcionario a cualifica di “imprudente” y a bisa cu por representa un menasa pa aviacion civil y comercio maritimo den e region.
E minister di Defensa di Hapon, Tomomi Inada, a bisa cu e lansamento tabata un “menasa serio” pa e siguridad di e pais y tabata cla cu Noord Corea tabata siñando di erornan di pasado.
“Pa loke ta e hecho cu e tres misilnan a aterisa casi den e mesun luga y casi na e mesun tempo, mi ta kere cu su tecnologia di misil a mehora substancialmente,” el a bisa.
Di su banda, e vocero di minister di Relacionnan Exterior di China, Hua Chunying, a yama pa calma. “Pa e momento, e situacion riba e peninsula (Coreano) ta bastante compleho y delicado,” Hua a bisa.
“Nos ta spera cu e partinan pertinente por evita tuma accion cu por aumenta e tensionnan y por realisa esfuersonan conhunto pa mantene paz y stabilidad riba e peninsula.”
CNN en Español