Departamento di Impuesto ta participa cu e ultimo dia pa entrega e declaracion di inkomstenbelasting 2015 ta 1 di December 2016 y kier gradici su clientenan cu a cumpli caba cu e termino di entrega. Pa tur e clientenan cu no por entrega nan declaracion pa e fecha stipula, automaticamente Departamento di Impuesto lo prolonga e termino di entrega cu 6 luna mas. Pues, e clientenan aki no tin mester di entrega un peticion manera tabata e caso den e añanan anterior.
Despues di e prolongacion automatico, e fecha final pa entrega e declaracion di inkomstenbelasting 2015 ta bira: 1 di Juni 2017.
Mester remarca cu Departamento di Impuesto ta prolonga e termino di entrega un solo biaha. Despues di 1 di Juni 2017 no ta posibel pa haya mas prolongacion. E maneho aki ta valido pa tur cliente particular y nan conseheronan fiscal of oficinanan di accounting.
Ta consehabel pa e clientenan cumpli cu entregamento di e declaracion dentro di e termino legal di 2 luna. Ta bon tambe pa tene na cuenta cu Departamento di Impuesto ta procesa tur cobransa definitivo segun e fecha cu e declaracion a wordo entrega. Ta mantene pues e termino ‘First in, first out’. E declaracionnan cu wordo entrega prome lo wordo procesa prome.
Cu e maneho nobo aki Departamento di Impuesto ta spera di por duna servicio mas eficiente y efectivo na su clientenan.