Sra. drs. Marisol Lopez- Tromp tambe a huramenta diabierna dilanti di S.E. Gobernador Sr. J.A. Boekhoudt y e ta splica con su experiencia e biaha aki compara cu tur e añanan anterior.
Esaki tabata e di 6 biaha, cu Sra. drs. Marisol Lopez Tromp ta den parlamento, sea como minister of como parlamentario. El a huramenta na 1997, na 2002, na 2005, despues na 2009, unda cu el a bira minister e tempo ey. Tambe na 2013 y awo na 2017. Esaki ta su di 6 biaha cu e ta drenta parlamento. E biaha aki, despues di 16 aña ta bira atrobe un gobierno di coalicion.
Tempo cu el a drenta politico y momento cu el a drenta parlamento, tabata un gobierno di coalicion. Pero na momento cu el a drenta den gobernacion, tabata un solo partido, MEP pa dos termino y AVP pa dos termino. E biaha aki ta un coalicion di tres partido. E ta un experiencia nobo, pero alabes den un solo partido, bo ta haya diferente podernan cu bo ta anda cu nan, den sentido cu ta haya parlamentarionan, ministernan y diferente posicionnan.
Awo ta haya tres partido, pero un solo programa y cu tur ta compromete nan mes pa ehecuta esaki. Esey ta nan tarea como parlamentario pa controla esaki pa vigila esaki, pa wak si e placa cu nan ta pone den presupuesto nan ta cumpli cun’e.
Segun Sra drs. Marisol Lopez- Tromp, su persona ta un ehempel bibo di un parlamento cu lo ta diferente. E biahanan cu el a vota diferente, of el a wordo saca afo of nan ta castiga bo, como partido. Pero ora bo vota pa bo pais, bo por ta sigur cu anochi bo ta drumi trankil. E tin hopi fe y siguransa cu e parlamento aki, cu su constelacion cu miembronan nobo y energetico. Miembronan cu a hasta vocifera pais prome y despues partido.
Mas aleu, Sra.drs. Marisol Lopez Tromp a bisa cu e tin hopi fe, cu cumpliendo cu e programa cu tur a compromete nan mes na dje y tambe pa controla esaki, cu nan lo ta den e bon caminda. Y con cu bay bin, parlamento ta hefe di gobierno y no pa robes. Y pueblo ta hefe di e parlamento. No mester lubida esey. Mientras cu tin un cantidad di parlamentario ta hefe di e 8 ministernan, tin un poblacion di un pais, di mas di 100 mil habitante, ta hefe di nan, como parlamento.