Pa e experto den cacho Sr. Kenny Montero ta splica cu e den e dianan aki nos mester ta mas atento cu nos bestianan specialmente cacho y pushinan y pa no mara nan. Sr. Montero ta amplia.
Manera tur hende sa, e oido di un cacho ta hopi mas avansa cu di un ser humano, un zonido di un klapchi ta zona dies mil biaha mas duro cu di un ser humano. Cada rato pa nan, ta mescos cu ta un bom ta cay banda di bo. Logicamente nan ta busca un caminda pa bay, pa nan aleha di e zonido. Door di esaki cu e bestianan ta subi caminda, cu consecuencia cu nan ta wordo gedal door di auto. Esaki ta conta pa e pushinan tambe. Lo ta bon pa e cachonan wordo gechip, esaki awendia ta bay na un manera economico. E doño ta hay’e bek, si nan hiba e bestia un veterinario, y nan wordo gescan.
Un conseho ta pa pone e mascotanan den un camber cera, of den un baño. Por pone musica relahante pe cachonan, cu nan por sinti nan mes mas relaha. Algo cu tambe ta bon pa haci, ta pa trempan den dia, laga nan ehercicio, pa nan por sinti nan mes cansa, cu anochi nan no tin hopi energia pa stress over di e zonidonan duro aki. Esey ta cosnan chikito cu por wordo haci, cu por tene e bestianan contento.
Un recomendacion di Sr. Kenny Montero, ta pa no mara e cachonan. Den nan spanto, nan ta keda lora e cadena, te cu nan por horca nan mes. Si hinca e cachonan den kennel hopi chikito, esaki ta trece stress cerca e bestianan tambe.
Un otro strategia, ora di maranan, Sr. Montero a bisa cu, si no tin otro opcion, cu mester mara e cacho, wak si por haya un harnas., cu e cadena no ta mara na su nek. Esey ta un alternativa mas safe pa cu maramento.
Tur hende sa cu nan bestianan mester ta den cura. Dentro di poco, KPA lo bin cu’n team di polis, pa locual cu Sr. Montero a trece na conocemento di e hefenan pa un par di biaha caba, cu nan tin na consideracion y cu pronto nan lo por tin un Animal Police Team, pa por eherce e control un tiki mas miho. Lo pone enfasis y lo implementa e ley un tiki mas miho, ya cu esaki actualmente ta laga hopi di desea, segun Sr. Kenny Montero, agente policial experto den cacho.