Segun Parlamentario mr. Juan E. Thijsen den principio cada cuater aña cu Aruba ta conoce un Parlamento nobo (“De zittingsduur van de Staten is vier jaren”) y hopi biaha ta enfrenta critica riba e funcionamento di Parlamento. Den e ultimo 2 biahanan bo ta haya varios fayo cu ta ripiti su mes tanto den funcionamento di Parlamento en general y tambe riba e funcionamento individual di parlamentarionan. Segun Parlamentario mr. Juan E. Thijsen, e nivel di funcionamento di Parlamento ta depende hopi di e ser humano (factor 1) y conocimento huridico (factor 2), p’esey evaluacion den eleccion di preparacion y mentalidad di candidatonan ta mas importante. Bon conocimento huridico ta un plus punt grandi pero un minimo na conocimento huridico ta recomendabel. Trabao di parlamentario ta encera traha cu ley y proceduranan legal tur dia y no ta un club social. Mentalidad egocentrico y coruptivo sigur ta elementonan pa evita. Teamwork ta importante pasobra nos sistema parlamentario ta basa riba organisacionan politico (partijen stelsel) pero interes general di nos pais ta na prome luga. E parlamentario mester por funciona den e realidad politico ey. Pa bira miembro di Parlamento sinembargo legalmente no ta rekeri ningun preparacion, experiencia of prueba di cierto mentalidad. “Om lid van de Staten te kunnen zijn is vereist, dat men ingezetene van Aruba en Nederlander is, de leeftijd van eenentwintig jaren heeft bereikt en niet is uitgesloten van het kiesrecht”. Ta keda na cada partido como organisacion politico pa pone hendenan capacita den posicion pa drenta Parlamento. Akinan ta na unda segun Parlamentario mr. Juan E. Thijsen asuntonan ta cuminsa robes. Fayo pa apunta politiconan bon prepara ta resulta despues den mal funcionamento di e parlamentario mes pero tambe su comportacion ta influencia e funcionamento di Parlamento en general. Remedi pa esaki segun Parlamentario mr. Juan E. Thijsen ta un bon formacion politico di miembro di partidonan politico. Un otro aspecto (factor 3) cu tambe ta hunga un rol ta e salario cu e parlamentario ta laga compara cu loke e ta bin gana como parlamentario. Parlamentario mr. Juan E.Thijsen mes ta bin di e sector priva y mester a laga un salario cu ta mas cu dobbel di loke e ta gana como parlamentario pero di otro banda bo ta haya parlamentarionan cu ta bin gana dobbel di loke nan tabata gana prome di bira parlamentario. Esaki por haci e parlamentario aki vulnerabel y su funcionamento por bin depende di esun cu a pone eynan. Su mentalidad ta ser domina pa interesnan partidista en bes di e bienestar general. Esaki por ta pio si e ta combina cu un respaldo di poco voto (factor 4). Segun Parlamentario mr. Juan E. Thijsen e 4 factornan combina ta trece entre otro e siguiente problemanan.
a. Ora bo no tin un Presidente di Parlamento fuerte bo ta haya cu hopi asunto no ta cana bon. Apesar cu Parlamento ta independiente Presidente di Parlamento ta laga Gobierno dicta e agenda di Parlamento. Cua ley si cua no, ki dia reunion ta ser tene y cua reunion si por y cua no.
b. Un presidente di Parlamento debil ta laga parlamentarionan pro Gobierno interumpi oradornan di oposicion na antoho. Pio ainda publico ta ser permiti pa interumpi opositornan na antoho y ta ser permiti di ofende opositornan sin control alguno di etica y moral y cu mentiranan sin ningun base.
c. Ministronan ta nenga di duna documento y tambe ta nenga di duna contestacion na preguntanan di oposicion . “Elk lid van de Staten heeft het recht vragen te stellen aan de ministers en de staatssecretaris”.
d. Parlamento conoce su propio reglanan cu Parlamento ta aproba pa cu su funcionamento.
“De Staten stellen het reglement van orde voor hun vergaderingen”. Den practica bo ta mira cu e Reglement van Orde ta wordo ehecuta hancho pa esnan pro Gobierno y smal pa oposicion. Esaki ta conduci cu parlamentarionan pro Gobierno no ta concentra den nan trabao di controla Gobierno sino ta dirigi nan mes riba oposicion y ta stroba oposicion di haci su trabao debidamente. Akinan factor Mentalidad sigur ta hunga un rol importante segun Parlamentario mr. Juan E. Thijsen.
e. E Parlamento di ultimo 8 añanan a conoce violacion legal den mas di un ocacion. E parlamentarionan pro Gobierno no ta tene cuenta cu instancianan constitucional manera Raad van Advies y Algemene Rekenkamer y pio ainda ta vota na fabor di leynan cu ta contra nos constitucion. E miho ehempel den esaki segun Parlamentario mr. Juan E.Thijsen ta e ley di Caft.
f. E fenomeno di stempel parlement ta domina funcionamento di Parlamento e ultimo 8 añanan. Parlamentario mr. Juan E.Thijsen ta compronde cu fraccion di AVP ta cumpli cu agenda di AVP pero tabata tin varios ocacion na unda e parlamentarionan por a coregi Gobierno pero nan no a actua. Un di nan ta e ley di Caft ya menciona pero e otro gran ehemplo ta e aprobacion di presupuestonan. “De verantwoording van de ontvangsten en de uitgaven van het Land wordt aan de Staten gedaan overeenkomstig de bepalingen van de landsverordening”. Manera conoci e situacion financiero di Aruba a bay for di man y hasta a culmina den un KB y Parlamento di Aruba por a pone orden pero a scoge pa aproba tur e presupuestonan irealistico di gobierno.
g. Parlamento di Aruba conoce e derecho di ley di iniciativa. “De Staten hebben het recht ontwerp-landsverordeningen aan de regering voor te dragen”. Esaki ta habri caminda pa oposicion tambe bin cu ley di iniciativa. Parlamentario mr. Juan E. Thijsen ta lamenta sinembargo cu e cultura politico na Aruba no ta cla ainda pa esey. Pa e motibo aki tambe Parlamentario mr. Juan E. Thijsen como legislador no a bin cu leynan di iniciativa apesar di tin varios ley den preparacion den ramo di economia y labor. Un di e “bottleneck”nan ta e parti di investigacion y pa cu esey como iniciador di ley for di oposicion bo no ta haya acceso na informacion y colaboracion di instancianan gubernamental. Gobierno tin control demasiado riba esaki.
h. Parlamentario mr. Juan E. Thijsen ta kere den nos sistema actual y cu e por funciona si bo tin e personanan cu e capacidad y mentalidad corecto envolvi. Partido AVP a fracasa den esaki y awo ta na MEP lidera Parlamento den un proximo temporada pa cumpli cu e reto aki. Parlamentario mr. Juan E. Thijsen y Partido MEP ta cla pa esey hunto p’e cambio sin miedo.