Den e ultimo dianan nos ta tendiendo di hopi movecion straño cu e Gobierno demisionario actual ta haciendo. Segun nos por a compronde, tin un cantidad grandi di ex coordinador, campañado y sostenedo di e partido berde cu a wordo hinca den diferente departamento gubernamental. Esaki sigur ta un falta di respet pa nan mes hendenan, pasobra nan sa miho cu e nombracionnan aki ta ilegal y no valido.
Partido AVP tabatin 8 aña pa regla e puesto laboral di nan campañadonan, y teniendo esaki na cuenta mi ta puntra mi mes, pakico bo no a haci’e anto?
Awor cu e resultado di eleccion 2017 a keda conoci, y cu pueblo a pidi pa un cambio, awor kier core haci un cantidad di nombracion sabiendo cu na momento cu e Gabinete nobo wordo instala, dicho nombracionnan no lo tin validez mas.
Algo cu tambe a yega na mi atencion ta cu Mike de Meza, e Minister demisionario encarga te ainda cu e carteranan di Turismo, Transporte, Energia y Medio Ambiente, a dicidi di kibra e moratorio cu tabatin pa cu transporte publico, unicamente 5 dia despues di eleccion.
For di dia 27 di september Sr. de Meza a encarga di acomoda, entre otro, algun coordinado y campañado, cu un vergunning di taxi.
E moratorio pa cu transporte publico a wordo implementa cu e finalidad di mantene un control riba e cantidad di taxista, como cu ya caba e cantidad di taxi cu tin ta di mas y nan no ta hayando suficiente entrada. E ta un iresponsabilidad loke cu sr. Mike de Meza ta haciendo pa acomoda su campañadonan, y e ta un lastima cu e personanan aki lo bay sufri un gran decepcion ora cu e Gobierno nobo bay over na honra e moratorio bieu, te ora cu bin cu argumentonan valido ariba mesa pa cambia esaki.
Mi kier haci enfasis cu nos no tin nada contra e personanan cu sea a wordo nombra despues di eleccion, a haya vergunning di taxi, of a haya cualkier otro tipo di beneficio politico.
E personanan aki ta den nan pleno derecho di campaña y vota pa cualkier partido di nan escogencia, pero e ta un lastima pa mira con e personanan aki a wordo tuma haci dor di esunnan cu nan a deposita confiansa aden.
Tur Minister di e Gabinete nobo lo bay evalua cada nombracion y cada beneficio otorga despues di 22 di september, pa wak bon si e trahadonan y e beneficionan aki ta necesario.
Den otro palabra, cada nombracion y beneficio otorga innecesariamente no lo wordo honra.