Nine Lives Aruba su presidente ta dos Mericano, cual ta Terry Daily y Valery Pierom. Nan ta turistnan cu a bin pa mas di 32 biaha pa Aruba y cada biaha nan ta wak e situacionnan cu tin na Aruba, di tanto pushi como cacho. Nan a acerca Sra. Tromp pa yudanan door cu Sra. Tromp ta pertenece na Criojojo Trappers pa lanta un fundacion pa yuda e bestianan di Aruba, legalmente pa yudanan pa mandanan Merca of Hulanda pa haya un miho bida.
Pa esey a lanta e fundacion Nine Lives. Den e fundacion aworaki nan tin 67 pushi, 6 cacho adulto, 1 mama cu su 8 puppies y 15 puppies. Di un manera of otro , no por laga e cachonan un banda tampoco y e otro fundacionnan ta yen. Cachonan di caya of pushinan bandona, tin su malesa y preocupacionnan cun’e. Turista no ta gusta maltrato di bestia y esaki ta trece un imagen malo pa Aruba.
Na januari, Criojojo Trappers a bay protesta pero lastimamente te ainda no a tende nada ainda di e minister. Y esey tin nan un tiki preocupa, ya cu prome e lo bisa cu lo bay check e caso, pero te ainda nan no a tende nada for di e minister en cuestion. Cada dia ta hiba mas cacho cu pushi na e killcage, tur cos ta sigui normal. E turistanan ta keha, hopi mes.
E fundacion ARF, ta di e Mericano, Cathy, y Sergeant Peppers tambe tin Dianne, cu ta Hulandes. Por ripara cu ta hendenan di afo ta bin resolve e problemanan di nos. Fundacionnan aki ta draai ariba donacion ya cu nan no ta haya subsidio di gobierno.
Criojojo Trappers actualmente tin un shelter so, y pa dia nan ta haya mas di 22 yamada pa dia. Nan por sterilisanan, pero despues kico? Nan no tin luga den nan shelter. Loke nan ta wak, ta un tereno grandi, unda tur e fundacionnan ta traha hunto. Ora cu e fundacionnan ta bay ‘trap’ tin un grupo di tur e fundacion ta bin hunto, intercambia di informacion y asina busca luga pa e animalnan aki. SI tur ta yen, no tin otro opcion di laganan bay.
Prome cu e bay protesta, tur e fundacionnan a sinta hunto. Y ora Criojojo Trappers a papia, el a papia na nomber di tur e fundacionnan na Aruba. A entrega un plan na minister en cuestion, di Salubridad, pero te ainda nan no a haya feedback for di e minister.
Mayoria di e fundacionnan ta focus ariba e cachonan. Pero ta hayando melding tur caminda, ya cu un fundacion a pushi a lanta. Pero nan no tin mas luga pa pone e pushinan. Tambe Sra. Tromp ta wordo acerca pasobra un auto a dal e pushi, etc., pa wordo yuda cu’n veterinario. Pero ta depende di e situacion financiero di e fundacion, sino lastimamente lo mester check cu otro fundacion pa yuda.
mayoria fundacion ta contra di e killcage, pero ki otro opcion por tin
Pa sterilisa un bestia ta costa hopi placa. P’esey Fundacion Stimami, Sterilisami cu ta yudando tur e fundacionnan, pagando tur e sterilisacionnan. Esey ta cu cooperacion cu Bucuti Beach Resort. E fundacionnan ta pagando tur e gastonan di sterilisacion, tanto pa pushi y cacho. Pa loke ta e killcage, esey semper ta keda existi, pero e manera con ta mata e bestianan, ta un manera hopi cruel. Di dos, nan no ta duna un doño sikiera 48 ora pa bay e killcage pa rescata su cacho of pushi.
Na januari cu nan tabata protesta, un persona a trece un cacho saludabel. Ora a puntr’e dicon e ta trece, tabata paso esaki tabata mata su galiñanan. Y el a warda e doño bay pa hiba e cacho killcage. Mester duna un doño 48 hora pa bin busca su bestianan, ta loke Criojojo Trappers ta para pe.
Ultimo tabata tin un situacion camidna un señora a haya falta di e cacho, door cu el a kibra e cadena y bay pafo. Ora el a yega di trabao, e no a haya e cacho. Ora cu el a bay check na killcage, el a bin haya su cacho morto caba.
No ta tur ora ta e doño ta tira e bestianan na killcage. Otro hende malo ta haci esaki. Pero nunca tabata tin un protesta contra di esaki. E forma con ta mata e bestianan, ta loke e fundacionnan ta protesta contra di dje, segun Sra. Tromp, di Nine Lives Foundation.