Nieto di Bill Hochstuhl ta Pilotia un Avion di 101 Aña – Un “Jenny” (Curtis JN4)

0

Skirbi pa Clyde Harms

Lt. Col Matthew Getty, un piloto di U. S. Air Force cu a sirbi den gueranan na Irak y na Afghanistan bulando un avion Lockheed C-5 Galaxy, ta nieto di Bill Hochstuhl kende, como redactor di Aruba Esso News a skirbi e buki “German U-Boat 156 Brought War To Aruba February 16, 1942”.

Durante Guera Mundial II, Bill Hochstuhl a sirbi como piloto den Navy Mericano na Groenland, patruyando den un avion PB2Y2 pa submarino Aleman den e awanan di Nort Atlantico. Bill a siña bula como un recluta hoben na e basa naval na Pensacola, Florida. Su instructor tabata e “Link Trainer” Srta Eileen Sivori, kende despues lo bira Señora Hochstuhl, wela di Matthew. (Sra. Hochstul a ricibi su propio licensia di piloto despues di e guera na 1946).

Despues di caba su entrenamento “Link”, Bill Hochstuhl a pasa hopi ora bulando un avion di training “Stearman” na Whiting Field cerca di Pensacola. E Stearman, un bi-plane (avion di dos ala), tabata un descendiente directo di e famoso Curtis-JN4, popularmente conoci como “Jenny”.

Te dos siman pasa, Matthew tabata Wing Commander di e 375th Operations Support Squadron pa dos aña na Scott Air Force Base y e transferencia di comando a wordo prepara. Considerando cu Scott AF Base tabata pa celebra su di 100 aniversario como un base pa train pilotonan y nan tabata uza e avion Curtis JN4 na cuminsamento, y pa casualidad e JN4 tambe tabata den su aña centenario, e base a invita un Jenny pa participa den e airshow como parti di e fesividadnan en coneccion cu e cambio di comando. Lastimosamente, e bientonan fuerte e siman ey a haci cu e Jenny no por a participa, ni sikiera bula, y e mester a keda na Scott airbase.

Dia Dorian Walker, e doño di e Jenny a bin busca su avion, el a ofrece di dal un rond riba e air-base prome cu e bula bay back di caminda el a bin. Na e momento ey, e Wing Commander nobo cu a caba di reemplasa Matthew a sugeri na Matthew pa acepta e oferta di Sr. Walker y dal un rond den e Jenny.

Matthew, un piloto cu a pasa centenares di ora bulando e C 5, un avion gigantesco cu capacidad di carga mas di 130 Jennies, un piloto cu a participa den “mid air refueling” na haltura di mas di 30 mil pia, mester a splica con e tabata sinti’e ora cu el a dal e romdo den e Jenny un avion habri cu apenas ta carga dos persona. Su contesta:

“Mi por bisa bo cu tabata un momento increibelmente bunita, sinta den un cockpit habri, den un avion di 100 aña, (aunke di berdad e ta un replica, pero traha segun specificacionnan exacto di e original cu hasta algun pieza original), bulando riba un base caminda ami tabatin e privilegio y honor di tabata comandante pa e dos añanan cu a caba di pasa. Agrega e ribibamento di e storianan cu mi welo cu tabata contami di bulamento den un avion cu dos ala, y bo por imagina bo cu tabata momentonan special”.

Wela Eileen a wak e video di e buelo y a yena cu orguyo mirando su prome nieto pilotia e Jenny di mas di 100 aña. Welo Bill Hochstuhl lo a keda encanta si e tabata cu nos ainda. Bill Hochstuhl tabata un di e prome personanan cu a ricibi e reconocemento di Aruba Goodwill Ambassador (1964), no pasobra el a bishita nos isla tanto biaha, (ainda e tabata biba na Aruba), pero pa tur loke el a haci pa nos hubentud tur e añanan cu el e tabata traha aki. [email protected]