CARACAS, Venezuela – Presidente Nicolas Maduro a bisa diamars, cu si Venezuela wordo confronta cu caos y violencia, e lo wordo “libera cu arma”, den un advertencia directo na su opositornan cu ta hibando casi tres luna di protesta riba caya, pidiendo pa e acepta pa yama den eleccionnan anticipa.
Den un acto cu siguidornan, el a haci un yamado na su adversarionan na atende na e “yamado di paz” cu ta representa su propuesta di reforma na e carta magna atrabes di un Asamblea Nacional Constituyente y a responsabilisa e presidente Mericano, Donald Trump, pa incentiva e violencia den e pais petrolero.
“Y mi ta bisa mundo, scucha esaki y mi ta aspira pa mundo scuchami: despues di 90 dia di protesta, di destruccion y di morto. Si Venezuela wordo confronta den e caso y den e violencia y e revolucion Bolivariano wordo distrui, nos lo bay combate,” el a afirma.
“Nunca nos lo bay rindi y loke no tabata por cu voto, nos lo haci’e cu arma, nos lo libera e patria cu arma,” el a agrega, prome di huramenta e integrantenan di e comando di campaña pa e eleccion di dia 30 di Juli di e miembronan di e Asamblea Nacional Constituyente.
Autoridadnan manera e Fiscal General, Luisa Ortega, ta rechasa como inconstitucional e convocatorio di Maduro y oposicion a bisa cu nan tin como intencion scondi pa evita cu e proximo eleccionnan wordo celebra, incluyendo esunnan presidencial di 2018, y instaura un “dictadura.”
Miles di persona a subi caya casi diariamente for di April cu marcha, tranca, planton, baricada y otro manifestacionnan pa exigi e celebracion di e eleccionnan, liberacion di e politiconan encarcela y pa permiti ayudo humanitario ante e escases di alimento y medicina.
Den hechonan violento cu a rondona e manifestacionnan y e fuerte represion di parti di forsanan di siguridad cu gas lagrimogeno, trucknan hidrante y perdigon, a muri por lo menos 75 persona, algun door di impacto di arma di candela di soldanan.
Mey mey di protesta, e aprobacion na e gestion di e heredero di e fayecido Hugo Chavez, a cay na Juni na un 20,8 porciento, 3,3 punto porcentual menos cu na April y cerca di e minimo di 18,1 porciento di April, segun un sondeo di compania local Datanalisis.
Maduro, un ex chauffeur di autobus di 54 aña, a señala su adversarionan politico como responsabel di un intento di golpi di Estado den su contra, respalda pa Washington y ta atribui e problemanan di e pais na un “guerra economico” di oposicion.
“Mi ta bisa Donald Trump, abo tin e palabra, abo tin e responsabilidad, detene e locura di e derecha violento Venezolano,” el a bisa den e acto cu movimientonan constituyente.
El a invit’e di nobo pa “papia di paz” y a alert’e cu si e yega na distrui Venezuela, e lo genera un crisis humanitaria pio di cual Europa ta biba cu miyones di Caribeño ta huy pa Merca.
“E mar Mediteraneo lo ta un mucha di pecho dilanti mar Caribe. Nan lo tin cu construi, presidente Trump, 20 muraya den lama, lo tin cu construi un muraya for di Mississippi te cu Florida, for di Florida pa New York, un locura,” el a bisa.
Fuente: www.lta.reuters.com