MANAGUA, Nicaragua- E Nicaraguensenan a demostra den fin di siman, un biaha mas, cu nan no ta dispuesto na give up. Esaki a pesar di e aumento di e represion y menasa di parti di gobierno, nan tin bon cla cu e lucha pa un Nicaragua pacifico y liber mester sigui, riba caya.
Asina tambe nan a demostra cu e tres marchanan celebra den fin di siman.
Luz Marina, un señora anciano, cu ya casi ta bay cumpli 80 aña y cu ta den rolstoel, a sigura cu e ciudadanonan lo sigui bringa pa loke ta corresponde na nan, “a pesar di miedo, pasobra cu no por nenga cu nan tin miedo, pero nos gana di tin un pais cu nos merece tambe t’ey, Cu tin menos hende den e marchanan no kiermen cu nos lo keda keto”, el a señala durante un marcha cu a tuma luga diadomingo. “Mester Sali ariba caya, mester keda akinan, ya cu loke Ortega ta haciendo no ta bon. E ta destruyendo nos capital y Nicaragua completo. A muri mucha, hobennan, mama, tata, etc. Y tur hende ta saliendo for di e pais. Kico lo para di esaki?”, Luz Marina a señala. E ta lamenta cu e economia ta sink, y tur hende lo keda ariba caya, un lo come otro si Ortega sigui na cabes di Nicaragua.
E manifestantenan a bisa cu e pueblo lo sigui firme contra di gobierno y cu e lucha no lo stop te ora cu nan wak e resultadonan desea: pa Ortega renuncia como presidente di Nicaraguya y un pais liber y husto. Desde cu e protestanan a cuminsa contra e maneho di Ortega y su gobierno, entre 277 y 351 persona a perde nan bida na man di “forsanan combina gubernamental”, integra pa polis, paramilitar, etc.
Nicaragua ta den un crisis sociopolitico mas sangriente desde e decada di 1980 cu Ortega tambe como presidente. E protestanan contra di Ortega y su casa, vice presidente Rosario Murillo, a cuminsa dia 18 di april ultimo, door di un reforma di siguridad social cu a faya y cu a bira un exigencia di renuncia di e mandatario, despues di 11 aña. E ta wordo acusa di abuso di poder y corupcion.