Ta un honor pa partido Red Democratico presenta Sr. Nelson Quandt como candidato nobo riba nos lista electoral 2017. Nelson Quandt a studia na Hulanda natuurkunde y despues cursonan di informatica y a bolbe Aruba pa traha como profesional riba tereno di IT management. E ta tata di famia y motiva pa crea un miho futuro pa su yuinan Nelson Quandt a dicidi di yuda trese un cambio positivo na Aruba pa medio di politica y di e partido politico ReD.
E punto mas importante den eleccion pa e votado no solamente ta e candidato sino tambe e programa di gobernacion di un partido. Bo ta vota pa un programa di un partido, su ideanan, su idealnan. Bo no ta vota pa sticker y bandera, bo no ta vota pa haya algo material. Bo ta vota pa e rumbo cu un partido kier hiba bo pais.
Pesei for di 2005 y cada eleccion ReD, e partido blanco, a bin cu un programa extenso. Y na 2017 no ta diferente, pesei nos ta pidi un y tur pa ta pendiente pa e launching di nos programa e weekend aki via e link di nos FB page Red Democratico. Temanan di ley di medio ambiente, anti- corupcion, bon gobernacion ta presente atrobe den nos programa. Y no por lubida e ley di financiamento di partidonan politico.
Nos ta conoci pa cumpli cu nos palabra y no ta duna promesa falso. Fraccion di ReD e tempo ey den parlamento a bin cu un mocion pa introduci un ley di financiamento di partidonan politico. Tanto gobierno di MEP y di AVP no a realiza esaki. Nan no kier transpariencia den nan fondonan, pasobra no kier trece na luz publico cu e mundo mafioso facilmente por usa e mecanismo aki pa laba placa y cumpra proteccion di un gobierno.
Den e programa di ReD tambe lo por lesa con cerca di e realidad nos ta y no ta papia di fantasia. Departamento di Asuntonan Social a caba di publica con halto e desempleo ta bao di hobennan, cu no tin diploma y cu poco futuro. Asina e tentacion ta grandi pa cai den gara di delincuencia hubenil. ReD ta presenta un programa preventivo pa no perpetua e delincuencia hubenil, cu un programa di formacion deportivo y cultural den oranan di atardi na tur scol despues cu scol caba. Y nos ta crea un pilar economico nobo pa duna trabao na nos hobennan, nos lo caba cu corupcion cu ta hasi negoshi cu permiso pa stranheronan y ta perhudica asina nos propio yuinan di tera cu ta keda sin trabao.
Asina tin hopi mas punto interesante den nos programa di gobernacion, keda pendiente pa nos launching di e programa aki den weekend riba e link di nos FB page Red Democratico. Sera conosi cu nos ideanan, cu lo convence bo cu no tin alternativa cu vota ReD. Di antemano danki pa bo confianza.