LONDON, Reino Uni – Reino Uni a desplega cientos di solda pa Europa oriental, mientras cu NATO ta sigui reforsa su presencia dilanti di loke ta precibi como un provocacion Ruso.
Den e mayor acumulacion di tropa den e region desde e Guera Friu, Reino Uni a confirma cu nan lo manda jetnan Typhoon pa Rumania durante un maximo di cuater luna na 2017.
E secretario di Defensa Michael Fallon tambe a confirma cu 800 efectivo lo wordo traslada pa Estonia, 150 mas di lo previsto inicialmente.
“E despliege di forsanan aereo, terestre y maritimo aki ta mustra cu nos ta bay sigui desempeña un papel destaca den NATO, apoyando defensa y siguridad di nos aliadonan desde nort pa zuid di e aliansa,” Fallon a bisa.
E anuncio a tuma luga un siman despues cu un flota Ruso, cu, segun reportenan ta na caminda pa Siria, a pasa cerca di awanan Britanico.
E tensionnan entre Moscu y NATO a bin ta aumenta desde cu Rusia a anexa e region di Krim na 2014.
E tensionnan ey a bin ta birando pio den e ultimo lunanan pa e papel di Rusia den e conflicto na Siria.
Diaranson, e secretario general di NATO, Jens Stoltenberg a bisa cu e reciente tacticanan di Moscu a obliga su organisacion na responde.
“Rusia a triplifica e gasto den Defensa,” el a bisa reporteronan.
“Rusia a inverti hopi den un ekipo militar moderno. Nan ta ehecutando ehercisionan na gran escala cerca di e fronteranan di NATO, pero kisas lo mas importante ta cu Rusia ta dispuesto pa uza forsa militar contra su bisiñanan.
“Nos a mir’e den Georgia y nos a mir’e na Ucraina cu e anexo ilegal di Krim y e continuo desestabilisacion di e parti oost di Ucrania. Asina ta cu por tanto, NATO tin cu responde.”
Ta di spera cu e tropanan di Reino Uni cuminsa cu nan despliege na Estonia na Mei di 2017.
Fuente: CNN en Español