TECNOLOGIA
E lansamento di e solar probe Parker, e prome avion espacial cu lo transita rond di e corona di solo, a wordo suspendi pa diadoming. Esaki ta e di tres biaha cu e lansamento ta wordo cancela, for di Cape Cañaveral, Florida.
E mision, cu ta pretende di yuda pa trece claridad di e misterionan cu e astro rey y cu ta planea pa yega den luna di november, lo mester wordo lansa den espacio diadomingo 12 di augustus, si e condicionnan climatico ta optimal.
E raket Delta IV Heavy di e compania United Launch Alliance tabata tin planea inicialmente pa lanta vuelo pa 03:33, hora local, for di e base aereo cu e probe a bordo, pero despues di dos suspension, el a wordo cancela pa motibonan tecnico. E mision cu tin caracter historico, ta pretende pa e probe recoge informacion mas cerca di solo, mas cu cualkier otro avion espacial a haci te cu aworaki. Y asin por contribui na resolver cuestionnan manera e diferencia di temperatura di e atmosfera di Solo, cu ta na mas di un miyon di grado mientras cu su propio superficie solar ta na 6 mil grado.
Despues di varios aña di investigacion, e ekipo a haya e manera pa e probe resisti na un calor ekivalente na 500 biaha cu experimentonan haci na Mundo. Asina tambe realisa e observacionnan “in situ”. Ta trata di un escudo termico cu lo wanta temperaturanan 1400 grado centigrado y lo mantene e instrumentonan di interior di e aeronave na temperatura ambiente (30 grado centigrado).
E probe, di dimension chikito (65 kilos y 3 meter di haltura), lo yega na un distancia di 6 miyon km leu di solo y lo haci su recorrido mas cercano na 2025, ora cu e lo por reuni e informacion di mas balor.