Den e partido clave aki, e ‘Derbi di Noord’ cu ta un “inhaal wedstrijd” di siman 17, Bubali cu tin 26 punto tabatin mester di un victoria so p’asina yega na dos punto so tras di Britannia cu tin 31 punto y asina sigui den e bataya pa yega play-off, bayendo den e ultimo wega di campeonato contra Britannia mes pa dicidi ken di nan dos ta bay play-off. Un empate of derota lo nifica final di nan aspiracion pa drenta play-off pa purba conquista e titulo maximo den futbol di Aruba. Deportivo Nacional cu ya ta clasifica pa play-off pero a bin di perde contra Britannia den nan ultimo partido, ainda tin chens pa sali lider di e campeonato regular kedando na top di e tabla di clasificacion, ‘feit’ ta cu den e derbi aki no ta existi ‘bahamento di man’, ta gana of nada, e rivalidad ta mucho grandi pa cualkier otro speculacion, ta hopi orguyo tin den wega.
Bubali a cuminsa ta ataka di biaha den e wega, for di minuut 1 caba. Ta manera nan a purba sorprende Nacional tempran, poniendo presion riba nan linea prome cu nan compone nan mes. Nacional ta un ekipo asina, nan ta gradualmente adapta nan mes tacticamente, pa despues exploita bo debilidadnan, un ekipo tacticamente solido.
Bubali a cuminsa bon y pa bay ‘mano a mano’ cu Nacional, atakanan, soprendenan, nan a tabata creativo incuyendo un nobato, e ‘rapido’ Roland Tromp, den e oncena, tur pa purba confundi e campeon nan di Aruba.
Ta bon, e strategia aki a funciona den e promer parti di e prome tempo, pero ya pa banda di 30 minuut di wega por a mira caba cu “just like that’ Nacional tabata dominando, no den e score ainda, esey no ta e indicacion na e momento ey, pero den e posesion, ganamento di bala, control di mid-veld, nan yegadanan tabata wordo traha for di patras den zona di volante te yega delantero, mientras cu Bubali ya tabata tira dilanti sin toke of rotacion, tin biaha cu tironan di lew sin proposito, en caso nan atakenan tabata wordo intercepta den medio-campo di Nacional, mas y mas tambe e delanteronan di Bubali tabata haya menos toke cada biaha.
E dominio aki di Nacional al fin a culmina na minuut 44 ora cu Kenroy Ranger, e actual goleador di Aruba su Division Honor, a cabesa un bala poni net riba su cabes for di un centro preciso na banda drechi di Devis Oliveros, Aruba su ganado di Balon d’Oro di anja pasa. Nacional ariba awo 1-0, ta mustrando improbabel cu Bubali por a anota ‘at all’. Mirando Bubali ta purba pero no ta logra menasa e porteria di Nacional cu poco yegada skerpi y di calidad, mientras nos ta mirando e revelacion di e “orguyonan di Noord” Ethan Tromp ta calentando na banda di tereno, pero t’asina mes halftime ta bay aden, e campeonan di Aruba cu un minimo bentaha di 1-0, pero toch cu un dominio enfatico.
E di dos tempo no a trece mucho cambio den e wega, cu awo ta mas bien un wega di control mental di parti di Nacional. Bubali cu mas iniciativa awo, ta purbando cu desesperacion, kizas un poco anticipa, kizas pensando cu no tin mayan pa nan, ainda sin resultado y Nacional manera un gran campeon ta warda pacientemente pa e buraco cu Bubali lo laga tras den nan intentonan di ataka, pa asina amplia e resultado na nan fabor. Cu e ingreso di Ethan Tromp den wega na luga di e hoben Roland Tromp cu a desempenja un bon papel den comienso di wega pero hungando contra Nacional a bay di mas pa menos segun e wega tabata evolviendo. Toch lo tabata interesante pa Ethan y Roland lo por a hunga hunto un biaha pa wak ki efecto nan lo por tin riba e wega y tambe pa yuda Bubali su banda ofensivo cu mester di ayudo, pero awe no tabata dia pa e ocasion ey. Ethan na su turno a yuda Bubali mantene posesion di bala inicialmente pero atrobe, controla medio campo hungando contra Nacional ta un reto gigantesco. Bubali mescos cu den e di prome mita, a mustra speransa den comienso, toch nan tabatin chensnan di gol mane esun di Edmar Tromp na minuut 70 y tambe Michael Tromp na minuut 75, pero pa gana Nacional mester di hopi mas oportunidad dilanti nan porteria, pero segun e minuut nan tabata pasando a cuminsa perde e caminda ideal ey, te na un punto di frustracion. E pensamento cu tempo tabata cabando y nan chensnan pa bay play-off a cuminsa afecta e wega di Bubali, balanan tabata wordo tira dilanti sin pasa den pia di e mediocampista creativo Marcel Kock y tambe Ethan Tromp den hopi ocasion.
E partido cu tabata duro pero ainda sportief den prome mita a sigui riba e mesun caminda, sin niun carchi, pero cu un tension cu tabata brouw poco poco, te cu e di dos tercio di wega unda cu e mal beis nan a subi, mane ta gasolin a wordo tira riba candela, no solamente cu e wega a bira violento na e momento ey pero tambe cu hopi mal intencion. Tabata e presion y frustracion di Bubali of e wega fisico di Nacional? e indiferencia di referee den algun ocasion cu algun hugada bruto of djies e timing di e carchinan? lo mester a otorga algun mas tempran den wega? E ‘derbi di Noord’ aki ta un wega di hopi pasion y tension, cu tin biaha hasta pa e miho oficialnan ta un reto grandisimo, esey no cabe duda.
E wega mes a sigui cu un ‘toma y dame’ den tur sentido di palabra, Bubali batayando sin tin mayan, pero Nacional controlando e wega.
Bubali, balente pero limita tambe contra e muraya cu yama Nacional, cu tur esey ta e ‘dragon nan’ tabata mas serca di anota nan di dos gol cu Bubali nan prome, esey ta futbol tin biaha. Al fin al cabo Nacional no tabatin mester di e di dos gol ey, e muraya tabata imbatibel. Ora cu Nacional tin su hendenan clave hunto den wega, hungadonan mane Deffery Banton, Kenroy Ranger, Devis Oliveros, Valdo Leocadio y otronan ta dificil pa gana nan. Desapunte anto pa Bubali, asina serca di play-off pero asina lew di e grandinan, un ekipo batayado sin duda. Bubali ainda tin un chens pa saka mas cara, si nan gana Britannia den nan ultimo wega, lastima cu esey no ta pa nan mesun clasificacion pero si pa nan propio honor.
Resultado final Nacional 1 Bubali 0. Nos ‘Man Of The Match’ ta Devis Oliveros, un hungado di full tereno, incasabel, creativo y humilde. Bubali cu 26 punto ta keda elimina for di play-off. Nacional cu 35 punto ainda por caba e campeonato regular na top di e tabla di Division Honor ganando nan ultimo wega y Dakota perdiendo cu RCA. Ta kiko lo pasa, tur cos ta posibel, keda pendiente, play-off ta biniendo!