Den luz di e informacion cu sali recientemente cu lo aumenta prijs di awa y coriente, Minister di Finanza, Asuntonan Economico y Cultura, Sra. mr. Xiomara Maduro ta aclarea cu esaki ta informacion incorecto.
Segun Minister Maduro, ningun momento a tuma decision pa aumenta e prijs di awa y coriente a base di locual ta e solucionnan cu a wordo treci dilanti pa WEB pa e problematica cu a surgi en cuanto e biento cu a supla e huma di WEB bay rib’e waf di Barcadera. E Minister a tuma nota di e preocupacionnan treci dilanti di parti di e trahadornan di ASTEC pa cu nan salud.
WEB a mustra rib’e posibel solucionnan cu por ehecuta pa alivia e molester cu e huma ta ocasionando riba esnan trahando riba waf di Barcadera, tur locual ta rekeri di inversionnan y WEB ta den negociacion cu RBA pa mira cuanto e piezanan necesario lo costa. E Minister ta sigura esaki no lo afecta e prijsnan actual di awa y coriente y cu no tin planes pa aumenta e prijsnan pa cubri e gastonan pa locual WEB mester.
Ademas, e Minister ta mustra cu e solucion en cuanto e problematica di huma no mester ta di parti di WEB so, sino a pidi tambe cooperacion di parti di ASTEC pa tene cierto medidanan di siguridad pa cu nan trahadornan. ASTEC a bin hopi mas despues di WEB, pero ambos ta companianan vital den nan funcion y ta imposibel pa cera un di nan.