Willemstad Curacao: Minister di enseñansa a reuní ku direktivanan di skol, servisio meteorológiko i ministerio di salubridat riba e ola di kalor ku for di siman pasa ta asotá nos isla. E kalor eksesivo a kontinuá awe tambe segun servisio di meteo a indiká den nan boletin.
Ayera riba su página di “facebook”, minister di enseñansa sra. Marilyn Alcalá-Wallé a informá dje reunion indikando lo siguiente: ”Ta konsiderá kambio den skema di vakashon grandi! Reunion ku Direktivanan di skol, Meteo i GMN tokante: E kayente di e dianan aki na skol; smog riba nos skolnan den área di refineria i kon ta atendé ku nan. Nos ta trahando riba liñanan di maneho”.
A komprondé ku durante di e reunion servisio meteorológiko a indiká ku semper den luna di sèptèmber ta kalor. Pero for di siman pasa i e siman aki tin un kalor eksesivo. Ta spera ku otro siman bientu lo lanta atrobe, pero manera tur hende sa tur kos ta dependé dje situashon di wer.
Riba e punto aki a indiká ku kisas lo ta bon pa kambia periodo di fakansi di yüli pa sèptèmber, mirando ku sèptèmber ta un luna kalor. Den otro paisnan den e periodo ku ta kalor, muchanan tin fakansi. Aki a papia di lo por rekonsiderá e periodo di fakansi di yüli pa sèptèmber. E asuntu di SMOG ta e huma di refineria Isla ku segun e wer ta bai riba skolnan den área di Buena Vista i kousa molèster.
E minister a indiká ku ta evaluando pa wak kon por repartí e kasi 600 muchanan di Juan Pablo Duarte ku konstantemente tin keho dje huma, pa otro skolnan i loke ku sobra pa aloká den un otro edifisio. E minister a indiká ku a laga hasi sondeo dje edifisio di St. Martinus na Otrobanda ku por ser usá pa aloká muchanan di Juan Pablo Duarte.
E ministerio di salubridat, GMN di su parti a duna informashon riba señalamentu di kalor ku por afektá un hende. Tambe kiko por hasi ora tin kalor, p’asina e kalor por tin ménos efekto riba e hende. Pa loke ta adaptashon di orario di skol e dianan aki te ku mañan, no a mishi ku e tópiko aki.
Cortesa di Extra Curacao.