CHINA – E ultimo mutacion descubri di e virus H7N9, esun mas mortal entrenan cu ta causa e griep aviar- por ta resistente na medicamentonan antiviral, segun e corant South China Morning Post a informa diaranson.
E contagio di e virus aki a dispara na China, den loke ta bay den e aña y diadomingo ultimo 94 persona a muri, 28 mas cu den henter 2016.
Virologonan encarga cu e investigacion a haya señalnan di resistencia na Tamiflu (e medicamento di referencia den e tratamento contra e griep aviar) den dos persona cu a wordo contagia cu esaki den e provincia suroriental di Canton.
E descubrimento aki no ta nifica necesariamente cu e medicamento no ta efectivo contra di e griep aviar, pero e expertonan ta sugeri cu mester investiga mas pronto posibel con pa controla e mutacion nobo aki.
De hecho, mayoria di e pashentnan cu a haya e griep aviar debi na e virus H7N9, a responde positivamente na e tratamento cu Tamiflu, di loke ta deduci cu e mutacion nobo aki no ta dominante riba esunnan existente anteriormente.
“Un cantidad considerabel di virus” no a muta, e experto den enfermedadnan respiratorio Zhong Nanshan, a señala.
E dos personanan contagia cu e mutacion nobo di H7N9 a tuma Tamiflu cu anterioridad, loke por a causa e resistencia e tratamento cu antiviral, segun e experto den enfermedadnan cantigioso di e Centro Provincial di Control y Prevencion di Enfermedadnan di Canton He Jianfeng.
China a informa di e hayasgo di e variacion nobo aki dia 21 di Februari, pero a señala cu, aunke tabata mas peligroso pa e parhanan, no ta representa un menasa adicional pa sernan humano.
Apart di e dos personanan menciona, autoridadnan a detecta e mutacion den cuatro ta mustra parhanan domestico di e region di Canton.
Esaki no ta prome biaha cu cientificonan Chines ta descubri cu e virus H7N9 ta capas di resisti e tratamento cu Tamiflu, algo cu ya a sosode na 2013, aña cu a sali e prome casonan di contagio den sernan humano, cu te cu awor aki a suma mas di 1200.
“E aparente facilidad cu loke ta emerge e resistencia na e antiviralnan den e virus A/H7N9 ta preocupante,” e investigadornan den un articulo publica den e revista medico “The Lancet” a sigura e tempo ey.
Tamiflu, cu ta administra den pildo, ta pertenece na un tipo di medicamento conoci como inhibidornan di neuraminidasa (e N di e denominacion di H7N1, cu ta coresponde na e distribucion di e proteinanan di e virus), igual cu e tratamento inhalabel Relenza.
Fuente: La Patilla