HOLLYWOOD, Merca- E musico Tom Petty a muri di un sobredosis accidental di varios remedi, segun un declaracion di su famia riba tompetty.com, y un comunicado di prensa di dokternan forense di e condado di Los Angeles.
E declaracion di e viuda y tambe yiu muhe di Petty, cu tambe a wordo publica riba Facebook, a bisa Petty, di 66 aña, tabata keha di dolornan prome cu su fayecimento dia 3 di October ultimo.
“A pesar di e dolornan aki, el a insisti den mantene su compromiso cu su fanaticonan y el a haci 53 presentación cu heup kibra y door di esaki, e lesion a bira pio. E dia di su morto el a haya sa cu su heup tabata full kibra y nos ta pensa cu e dolor tabata simplemente insoportabel, pa cual el a tuma remedi di mas”. Esaki segun su casa.
Petty a colapsa den su cas na Malibu y el a wordo hiba pa e Centro Medico di UCLA, unda el a muri dia 3 di October, segun su gerenta. E grupo di musiconan di Petty a termina e gira di verano cu tres actuacion na Hollywood, poco prome cu el a muri.
Petty & the Heartbreakers a haya fama den decada di 1970. Tabata e grupo aki tameb como solista cu Petty tabata tin un serie di exitonan a traves di decadanan, incluyendo “Free Fallin'”, “American Girl” y “I Will not Back Down”.