Raymundo Dijkhoff hefe di departamento scientifico di Museo Arqueologico Nacional Aruba y hefe interino, a duna splicacion di trabounan di excavacion cu ta tumando luga na Santa Cruz 35. Un sitio cu pa di tres biaha ta wordo excava unda cu a haya rastronan historico y prehistorico.
‘Bo mester imagina cu tin rastronan di mil aña di actividad di e ser humano, nos ta para den centro di ciudad cu tabata capital di Aruba den epoca pre historico. Kiermen den tur e areanan aki lo haya restonan di cas, fogon, entiero, luganan cu tabata dump etc. Loke cu a haya pre historico akinan ta mustra manera marca di casnan di Indjan y algun entiero. Cual no tin nada di haber cu e santananan di entiero structura cu tin na e sitio unda cu ta wak cu nan ta pertenece na otro’.
Metodo di excava innovativo
Segun sr. Dijkhoff na 2001 y na 2012 a excava y a haya un santana historico fecha entre 1730 pa 1810, cu tin informacion cu tabata totalmente desconoci pa nos historia. Mirando e cooperacion cu tin cu Nexus 1492 desde 2014 unda cu diferente parti di e sitio aki ta wordo investiga cu expertonan for di diferente area entre otro di Europa pa cual tin dos experto na Aruba actualmente. Nan a bin cu sistemanan mas avansa manera 3D y diferente otro metodonan hopi moderno y innovativo den archeologia y den mundo scientifico.
“E proyecto aki ta parti di un proyecto mas grandi entre Nexus 1492 y museo arkeologico firma pa nos Minister encarga cu cultura Otmar Oduber cual ta manda palabranan di gradicimento p’e”, segun Marguerita Wever hefe di departamento educativo di Museo Arqueologico Nacional Aruba.
Meta
‘Un di e metanan ta pa haya sa e dimension di e santana, anteriormente a coba 50 meter cuadra, aworaki ta aplicando un sistema di coba den “sleuven”. Door cu tin tempo ainda ta bay habri full e tereno, sinembargo e idea no ta pa saca material/ skelet afo etc. Otro meta ta pa nos personal update nos mes atrobe cu strategianan moderno di excava entre otro cu e expertonan aki tin hopi conocemento di dje.’
Hayasgo
Segun sr. Dijkhoff te cu aworaki tin 7 ‘sleuven’ cu a habri y ta hayando rastronan prehistorico cu no tin nada di haber cu e santana cu ta historico. Tambe ya a determina unda e parti zuid y west ta caba, pero e parti noord y oost ta desconoci ainda. P’esey lo habri e resto di area cu por habri, pa haya full un bista di cuanto graf tin ainda.