Mundo ta kedando sin antibiotico?

0

Organisacion Mundial di Salud (WHO) a adverti cu ta existi un falta grave di antibioticonan nobo den fase di desaroyo pa combati e creciente menasa di e resistencia di e superbacterianan.
E informe “Antibacterial agents in clinical development – an analysis of the antibacterial clinical development pipeline, including tuberculosisde,” cu a duna di conoce e siman aki, ta indica cu tin hopi poco opcion terapeutico posibel pa e infeccionnan resistente na e antibioticonan señala pa WHO como e mayor menasanan pa salud y cu ta inclui tuberculosis, resistente na remedi cu ta causa alrededor di 250 mil fayecimento cada aña.
Aunke varios dozijn di antibiotico ta den desaroyo, mayoria ta modificacionnan di e clase di antibioticonan existente y poco “probablemente ta cubri un gama mas amplio di patogenonan resistente,” e rapport ta señala.
Ademas di e bacterianan causante di tuberculosis multiresistente, WHO a identifica 12 clase di patogenonan prioritario – algun di nan causante di infeccionnan frecuente manera neumonia of infeccionnan den e vianan urinario – cu cada biaha ta mas resistente na e antibioticonan existente y ta rekeri cu urgencia tratamentonan nobo.

Patogenonan resistente
Cincuenta y un antibiotico nobo y biofarmaconan ta den e fase actual di desaroyo clinico y por wordo uza pa trata infeccionnan causa pa patogenonan resistente na e antibioticonan ma prioritario, ademas di tuberculosis y e enfermedadnan diareico, ocasiona pa Clostridium difficile, cu por ta mortal.
Sin embargo, solamente ocho di e moleculanan aki cu potencial terapeutico a wordo clasifica pa WHO como tratamentonan innovador cu ta ofrece alternativanan valido na e actual arsenal di antibiotico.
“E resistencia na antimicrobiano ta un emergencia pa salud mundial cu ta compromete gravemente e avance di medicina moderno. Tin un necesidad urgnte di aumenta e inversion den investigacion y desaroyo pa lucha cu e infeccionnan resistente na antibiotico, entre nan tuberculosis. Di otro modo, nos lo bay ben na e tempo caminda cu hende tabata tin miedo di contrae infeccionnan habitual y tabata pone den riesgo nan bida si nan somete na intervencionnan kirurgico simpel,” dokter Tedros Adhanom Ghebreyesus, director General di WHO a señala den un comunicado.
Na Merca, e Ley di Cura di siglo 21, aproba pa congreso na December ultimo, ta haci ainda mas facil cu antibioticonan yega riba mercado, den parti, permitiendo ensayonan clinico mas chikito.

Tuberculosis
WHO ta señala un grave falta di opcionnan terapeutico pa Mycobacterium tuberculosis multi resistente y ultraresistente y contra bacterianan gramnegativo, entre nan enterobacteria (manera Klebsiella y E. coli) y Acinetobacter, cu por causa infeccion di gravedad, cu frecuencia mortal y cu ta specialmente peligroso na hospital y residencianan di anciano.
Ademas, tin hopi poco antibiotico den fase di desaroyo cu por wordo administra oralmente, apesar cu e formulacionnan aki ta hopi necesario pa trata e infeccionnan pafo di hospital y den luganan di escaso recurso.
Pa enfrenta e menasa aki, WHO y e Iniciativa Mecidamentonan pa Enfermedadnan Desatendi (DNDi), nan a establece e Global Antibiotic Research and Development Partnership (GARDP) of Aliansa mundial di investigacion y desaroyo di antibiotico.

Fuente: www.holadoctor.com