Comandante na warda a dirigi patruya na altura di La Cabana pa un caso di robo. Eynan a papia cu personal di siguridad L., kende a declara cu diadomingo, pa mas of menos 5’or y 28 di atardi, un dama, kende ta kedando eynan, a bin bis’e cu el a wordo horta pa un homber, cu e homber aki lo a dal’e na su cara cu mokete y a bay cu su cartera. Ora cu L. a bay cu e dama na su camber, L. a wak cu e cartera tabata den cushina. E muhe a cambia su storia y a bisa cu 45$ tabata den su carson, a wordo horta. Dialuna, e mesun muhe a bisa L. cu su renchinan di horea a wordo horta. Polis a bay papia cun’e. E muhe kende ta T., naci na Merca, a declara cu diadomingo, pa mas of menos 5’or y 45 di atardi, un homber color cla, postura delega, di mas of menos 1.79 meter id haltura, lo a bin riba dje y a dal’e bao di su wowo y a coy 45$ for di den su saco di carson drechi, y a core bay. Segun T., e no ta corda con e sospechoso tabata bisti. Polis a splik’e bon cla cu un keho falso ta castigabel. T. a declara cu e no ta haciendo ningun keho falso. V. a declara cu el a mira imagennan di video, pero no loke e muhe a declara. Polis a mira cu e tabata tin un pleki cora bao di su wowo drechi, pero no ta convenci di un mokete duro. Polis a tuma tur informacion y comandante na warda a wordo poni na altura.