LONDON, Inglatera – Un muhe Britanico a duna luz na su nieto cu e ovulonan gevries di su yiu muhe, kende a keda steril cu 18 aña despues di un tratamento contra un cancer di boca di matriz, EFE a reporta.
Julie Bradford, di 45 aña, a duna luz na Jack Jenkins diabierna ultimo pa yuda su yiu muhe,
Jessica Jenkins, di 21 aña, na kende el a ofrece su matriz pa e gestacion di su nieto.
E hoben a wordo diagnostica tres aña pasa cu un cancer di boca di matriz y prome cu cuminsa e tratamento, a dicidi pa vries su ovulonan den e Hospital Universitario di Cardiff, Wales, pensando den bira mama den un futuro.
Na comienso di e aña aki, Jenkins y su casa, Rees Jenkins, a dicidi pa tin un yiu mediante fecundacion in vitro, un soño haci realidad danki na e wela, kende a trece e baby na mundo, cu a pesa casi tres kilo.
“Mi mama ta esun cu tin mas curashi y maraviyoso na mundo. Mi stim’e hopi pa duna bida na mi yiu,” Jenkins a declara na BBC, kende a splica cu desde un edad hopi tempran e kier a bira mama y cu, por fin, su soño “a bira realidad.”
Di su parti, Bradford a confesa cu durante e enfermedad di su yiu el a sinti su mes hopi inutil, mientras cu awo e ta hopi feliz doordi por a participa den e nacimento di su nieto.
Nos a pasa hopi tempo den hospitalnan y esaki a bira algo normal pa nos. Mi ta hopi feliz cu e ultimo bishita aki tabata pa un razon asina maraviyoso,” e wela a declara, kende ya tin tres yiu.
Fuente: El Universal