COLUMBUS, Ohio – Casi dos aña despues, cu Judy Malinowski a wordo baña cu gasolin y sendi na candela, el a fayece di su heridanan.
E mama di Judy, Bonnie Bowes, a confisma e storia tristo diamars merdia. “E mucha eynan a sufri pa dos aña pa conta su propio storia, ken tin e forsa pa haci’e?”
Judy Malinowski, 33, a wordo kima horificamente pa su ex amigo na Augustus 2015 pafo di un stacion di gasolin na Gahanna. Despues di 59 operacion y casi 2 aña den hospital, Judi a move pa un Centro di Cuido Paliativo na Mei.
E morto di Judy a presenta net cu e Senado di Ohio tabata a punto di pasa e Ley di Judy, “Judy’s Law”. E ley aki ta pa pidi pa castigonan den casonan manera esun di Judy, caminda cu e victima ta keda permanentemente desfigura, door di uzo di cualkier acelerante. E ley a pasa unanimamente na Mei.
E yiunan di Judy tabata den shock, ora cu nan a wordo bisa di e fayecimento di nan mama.
Michael Slager, e homber kende a ataca Judy, ta sirbiendo solamente un sentencia di 10 aña pa e atake.
Kaylyn Malinowski, 13, ta e yiu muhe mayor di Judy. El a testigua siman pasa dilanti di un comite di Senado di Ohio.
“Mientras cu el a haya 11 aña, mi mama, mi ruman muhe y ami a haya un cadena perpetua,” Kaylyn a bisa. “Mientras cu nos ta para awe, mi mama ta riba un cama di hospital unda cu e tabata pa 689 dia.”
Na Januari, Judy a graba un deposicion seya cu por wordo uza como evidencia den un caso den corte den futuro, si Slager wordo acusa pa asesinato.
Di acuerdo cu Fiscal di Franklin County, Ron O’Brien, su despacho awo ta tumando e pasonan necesario pa bin cu cargonan di asesinato agrava contra di Slager.
E famia lo uza e $3000 NBC4 a recauda pa e famia riba gastonan di entiero y pa yuda e yiunan di Judy. E entiero lo ta habri pa publico, pero ningun detaye a wordo divulga ainda.
Fuente: www.nbc4i.com